रौतहट । रौतहटको वृन्दावन नगरपालिकाले आफ्नो स्वामित्वमा रहेको जग्गा अतिक्रमण गरी बनाइएका दुईवटा घर शुक्रबार भत्काएको छ । नगरपालिकाको निर्माणाधीन आधुनिक प्रशासनिक भवनको काममा अवरोध पुगेपछि प्रहरी प्रशासनको सहयोगमा ती संरचना हटाएर जग्गा खाली गराइएको हो ।

नगरपालिकाका अनुसार स्थानीय शैनुल नट र राम बिनय ठाकुरले वर्षौँदेखि नगरपालिकाको दुई कट्ठा जग्गा अतिक्रमण गरी बसोबास गर्दै आएका थिए ।

उक्त स्थानमा नगरपालिकाले ६ करोड ४६ लाख ५५ हजार ५५५ रुपैयाँको लागतमा आधुनिक सुबिधायुक्त प्रशासनिक भवन निर्माण गर्ने योजना अघि सारेको छ । निर्माणको जिम्मा सिपी यतिआलम जेभीले पाएको छ ।

नगरपालिकाले पटक-पटक सूचना जारी गर्दा पनि टेरपुच्छर नलगाएपछि गत चैत १ गते जनप्रतिनिधि, कर्मचारी र स्थानीयबीच छलफल भएको थियो ।

उक्त छलफलमा चैत १० गतेभित्र घर खाली गर्ने सहमति भए पनि उनीहरूले सहमति विपरीत चैत १८ गते जिल्ला अदालत गौरमा मुद्दा दायर गरेका थिए। अदालतले सुरुमा निषेधाज्ञा जारी गरे तापनि चैत २५ गते जाहेरवालाको मुद्दा खारेज गरिदिएपछि नगरपालिकालाई कानुनी रूपमा बाटो खुलेको हो ।

अतिक्रमित २ कट्ठा जग्गा खाली गराएसँगै अब नगरपालिकासँग भवन निर्माणका लागि कुल ८ कट्ठा जग्गा उपलब्ध भएको छ । वडा नं. २ का अध्यक्ष सिकेन्द्र पटेलका अनुसार जग्गा अभाव र अतिक्रमणका कारण लामो समयदेखि भवन निर्माणको काम प्रभावित भएको थियो ।

नगरप्रमुख बिनोद पटेलले बारम्बारको आग्रह र सहमतिलाई अटेर गरिएपछि विकास निर्माणको कामलाई अघि बढाउन बाध्य भएर कानुनी प्रक्रिया पु¥याई संरचना हटाउनुपरेको बताए । अब प्रशासनिक भवन निर्माणको काम तीव्र गतिमा अघि बढ्ने नगरपालिकाले जनाएको छ ।