काठमाडौं । शिक्षा विज्ञान तथा प्रविधि मन्त्रालयले शैक्षिक परामर्श तथा भाषा प्रशिक्षण सम्बन्धी संस्थाको लागि नवीकरण दस्तुर तोकेको छ ।

मन्त्रालयेले हालै सार्वजनिक गरेको सुचना अनुसार सबैभन्दा धेरै दस्तुर नेपालमा शैक्षिक मेला आयोजना गर्न चाहने विदेशी संस्थालाई तोकिएको छ । मन्त्रालयका अनुसार यस्ता संस्थालाई एक पटक मेला आयोजना गर्न एक हजार अमेरिकी डलर शुल्क तोकिएको छ ।

त्यस्तै शैक्षिक परामर्श सेवा र भाषा शिक्षण दुवै प्रकारको सेवा प्रदान गर्ने संस्थाको स्वीकृतिको लागि पचास हजार रुपियाँ शुल्क तोकिएको छ । त्यस्तै शैक्षिक परामर्श सेवा र भाषा शिक्षण दुवै प्रकारको सेवा प्रदान गर्ने संस्थाको लागि आवेदन दिँदा थप पाँच हजार रुपियाँ शुल्क बुझाउनुपर्ने हुन्छ ।

यस्ता संस्थाको नवीकरण गर्दा २० हजार रुपियाँ दस्तुर बुझाउनुपर्ने मन्त्रालयले जनाएको छ । तर नवीकरण गर्न बिलम्ब गरेमा थप पाँच हजार रुपियाँ जरिवाना लाग्नेछ । नेपाली आयोजक भएर नेपालकै शिक्षा प्रणालीबारे जानकारी दिने उद्देश्यले शैक्षिक मेला आयोजना गर्नुपरेमा पाँच हजार रुपियाँ दस्तुर लाग्नेछ ।

तर नेपाली आयोजक भएर पनि विदेशी शिक्षाको बारेमा परामर्श दिनेगरि मेला आयोजना गर्न लागिएको हो भने दश हजार रुपियाँ दस्तुर लाग्ने मन्त्रालयको शैक्षिक परामर्श तथा प्रमाणीकरण शाखाले जनाएको छ । साथै नेपाली आयोजक भएपनि विदेशी शिक्षा र विदेशी प्रतिनिधि नै उपस्थित भएर मेला आयोजना गर्ने हो भने बीस हजार रुपियाँ लाग्ने उक्त शाखाले जनाएको छ ।

शैक्षिक परामर्श सेवा तथा भाषा शिक्षण सम्बन्धी निर्देशिका, २०७७ ले यस्ता संस्थाहरुलाई दर्ता तथा नवीकरण शुल्क तोक्न सकिने व्यवस्था गरेको छ । सोही व्यवस्था अनुसार मन्त्रालयको मन्त्रीस्तरिय निर्णय अनुसार यि दस्तुर तोकिएको हो ।