दुई-तीन जना नेताले कांग्रेसलाई बन्धक बनाएको संस्थापन पक्षीय नेताहरूको आरोप
नागरिक प्रेस १८ कार्तिक २०८२
काठमाडौं । पार्टीको १५ औं महाधिवेशनको कार्यतालिकामा सहमति जुट्न नसकेपछि नेपाली कांग्रेसका संस्थापन पक्षीय नेताहरू अलग्गै छलफलमा जुटेका छन् ।
नयाँ बानेश्वरस्थित आनन्दभूमि ब्याङ्क्वेटमा जारी उक्त छलफलमा केन्द्रीय सदस्यहरूले पार्टीको आन्तरिक जीवनलाई बलियो बनाउनको लागि महाधिवेशनको मिति तोकेर अगाडि बढ्नुपर्ने कुरामा जोड दिएका छन् ।
पार्टीको इतर पक्षले मङ्सिरभित्रै नियमित महाधिवेशन सम्पन्न गर्नुपर्ने अडान राखेका छन् भने संस्थापन पक्ष निर्वाचनपछि अधिवेशन धकेल्ने पक्षमा देखिएको छ ।
छलफलमा तत्काल पार्टीलाई निर्वाचनको तयारीमा केन्द्रित गर्दै सँगसँगै महाधिवेशनको तयारी कसरी अगाडि बढाउने भन्ने विषयमा भइरहेको छलफलमा सहभागि पार्टी केन्द्रीय सदस्य गुरु बरालले बताए ।
उनले पार्टीको आन्तरिक जीवनलाई बलियो बनाउने गरी महाधिवेशनको मिति तोकिनुपर्ने पनि बताए ।
उनले भने, ‘पार्टीको आन्तरिक जीवनलाई नै बल्बल्याउनेगरी जसरी प्रयत्न भयो यसलाई देशभरीका केन्द्रीय सदस्य साथिहरुले पार्टीलाई संगठित, बलियो र एक बनाउने कुरामा र पार्टी अग्रगामी छलाङका साथ जाने कुरामा हामीले महाधिवेशनको तिथिमिति तोकेर जानुपर्छ । यस कुरामा हामी प्रष्ट छौं । यो संसद विघटन असंवैधानिक हो । यो हामीले मानेका छैनौं । तर नेपाली कांग्रेस लोकतान्त्रिक पार्टी हो । हामी आवधिक निर्वाचनमा विश्वास गर्छौं । त्यसकारण हामी निर्वाचनलाई नकार्न सक्दैनौं, हामी निर्वाचनमा भाग लिन्छौं । निर्वाचनर महाधिवेशनको तयारी सँगुसँगै कसरी हुनसक्छ ? यो पनि अहम प्रश्न छ । त्यसकारण पार्टीको १५औं महाधिवेशनको तिथिमित र चुनावको तयारी सँगसँगै कसरी जाने भन्ने विषयमा हामी साथिहरुसँग परामर्श गरिरहेका छौं । पार्टी कार्यसम्पदान समिति अल्मलिएको छ । पार्टी लामो समयदेखि दुई तीन नेताको बन्धक बनेको छ । त्यसकारण हामी आज नयाँको छलफलबाट नयाँ प्रश्ताव लिएर जाँदैछौं ।’
महाधिवेशनको कार्यतालिकामा सहमति जुट्न नसक्दा पार्टीको केन्द्रीय समिति बैठक बस्न सकिरहेको छैन । अर्को बैठक मंगलबार दिउँसो १ बजेको लागि बोलाइएको छ ।
