काठमाडौं । काठमाडौं महानगरपालिकाले ‘मुस्ताङ गोल्ड’ मदिरामा अखाद्य पदार्थ भेटिएपछि कारबाही गर्दै दुई लाख रुपियाँ जरिवाना गरेको छ ।

धनुषा डिस्टिलरी प्रा. लि. द्वारा उत्पादित ‘मुस्ताङ गोल्ड’ बिक्री भइरहेको अवस्थामा झिँगाजस्तो वस्तु फेला परेपछि उपभोक्ताले महानगर प्रहरीमा उजुरी दिएका थिए । नमुना सङ्कलन गरी परीक्षण गर्दा बोतलभित्र अखाद्य तत्त्व भेटिए पछि जरिवाना गरिएको हो ।

महानगरको बजार व्यवस्थापन तथा अनुगमन ऐन, २०७५ अनुसार यसलाई अनुचित व्यापारिक गतिविधि मानिएको छ ।

महानगरको कृषि तथा पशुपक्षी विभागका अनुसार, जरिवाना रकम काठमाडौं महानगरपालिकाको राजस्व खातामा जम्मा गरिसकेपछि सोको जानकारी विभागमा पेस गर्नुपर्नेछ ।