रौतहट । रौतहटको फतुवा विजयपुर नगरपालिका-३ स्थित आधारभूत विद्यालय मेवामा बिहीबार राति अज्ञात समूहले ताला फोडेर चोरी गरेको छ।

विद्यालयको स्टोर र गेटको ताला तोडेर ग्यास चुल्हो, सिलिन्डर, तेल–मसला, बाल्टिन, कुर्सी, इन्टरनेट राउटर, नेपाली शब्दकोश तथा विद्यार्थीहरूलाई हातखुट्टा धुने ५० भन्दा बढी साबुनलगायतका सामग्री चोरी भएको विद्यालयले जनाएको छ।

विद्यालयका प्रधानाध्यापक रामजन्म महतो कहारका अनुसार चोरी भएका सामानहरू प्रायः दिवा–खाजाका लागि ल्याइएको सामग्री थिए। अस्थायी प्रहरी चौकी मेवाले रड प्रयोग गरी ताला तोडेर चोरी भएको पुष्टि गरेको छ।

घटनास्थल अवलोकनका लागि पुगेका वडा अध्यक्ष रामेश्वर राय यादव र युवा नेता बिरेन्द्र यादवलगायतका स्थानीयहरूले विद्यालय नजिकै प्रहरी चौकी हुँदाहुँदै चोरी हुनु सुरक्षा व्यवस्थामाथि गम्भीर प्रश्न खडा भएको बताएका छन्।

अहिलेसम्म चोरीमा संलग्न व्यक्तिको पहिचान नभएको र खोजी कार्य भइरहेको अस्थायी प्रहरी चौकी मेवाका असई संजय रामले जानकारी दिए।