भेनेजुएला भूकम्पमा मृत्यु हुनेको संख्या २३५ पुग्यो, ४ हजार बढी घाइते
नागरिक प्रेस १२ असार २०८३
काठमाडौं । दक्षिण अमेरिकी राष्ट्र भेनेजुएलामा हालै गएको शक्तिशाली दुईवटा भूकम्पपछि मृत्यु हुनेको संख्या २३५ पुगेको छ भने ४ हजार ३०० भन्दा बढी मानिस घाइते भएका छन् ।
भेनेजुएलाकी स्वास्थ्यमन्त्री कारिका अल्भाराडोका अनुसार अधिकांश घाइते सामान्य अवस्थाका भए पनि धेरै गम्भीर घाइतेको शल्यक्रिया गर्नुपरेको छ । उनले अस्पतालमा ल्याइएका २३५ जनालाई मृत घोषणा गरिएको जानकारी दिइन् ।
भूकम्पका कारण राजधानी काराकाससहित ला गुआइरा, काराबाल्लेडा, भार्गासलगायतका क्षेत्रमा व्यापक भौतिक क्षति पुगेको छ । हजारौं भवन भत्किएका छन् भने सडक, पुल र अन्य पूर्वाधारमा समेत ठूलो क्षति पुगेको छ । यसबीच प्रभावित क्षेत्रमा राहत तथा उद्धार कार्य तीव्र पारिएको छ ।
सयौं स्थानीय स्वयंसेवकले पानी, खाद्यान्न, औषधि, लत्ताकपडा तथा अत्यावश्यक सामग्री वितरण गरिरहेका छन् । विपक्षी नेतृ मारिया कोरिना माचाडोको दलले पनि स्वयंसेवक परिचालन गर्दै राहत संकलन अभियान सञ्चालन गरेको जनाएको छ ।
अमेरिकाले पनि मानवीय सहायता अभियानलाई सहयोग गर्न आफ्नो दक्षिणी कमाण्ड मार्फत सी–१७ ग्लोबमास्टर र सी–१३० हरक्युलिस सैन्य मालवाहक विमान परिचालन गरेको छ । ती विमानमार्फत राहत सामग्री, उद्धार उपकरण तथा आवश्यक जनशक्ति प्रभावित क्षेत्रमा पुर्याइँदैछ ।
संयुक्त राष्ट्रसंघका महासचिव एन्टोनियो गुटेरेसले भूकम्पबाट भएको ठूलो जनधनको क्षतिप्रति गहिरो दुःख व्यक्त गर्दै संयुक्त राष्ट्रसंघले भेनेजुएला सरकारसँग समन्वय गरेर आपत्कालीन राहत तथा मानवीय सहायता उपलब्ध गराइरहेको बताएका छन् ।
लोकप्रिय
