काठमाडौं । काठमाडौंको माइतीघर मण्डलमा आइतबार जेनजी पुस्ताका किशोरीहरूको एक समूहले डिम्ब व्यापार र डिम्ब तस्करीविरुद्ध विरोध प्रदर्शन गरेका छन्।

बिहान ११ः ३० बजेदेखि दिउँसो १२ बजेसम्म विभिन्न प्लेकार्ड र नाराबाजीसहित आयोजित उक्त प्रदर्शनमा युवा अभियन्ता तथा सर्वसाधारणको उपस्थिति रहेको थियो।

प्रदर्शनकारीहरूले पीडित किशोरीहरूलाई तत्काल न्याय दिनुपर्ने, डिम्ब तस्करीमा संलग्न रहेको आरोप लागेका पूर्वमहान्यायाधिवक्ता सबिता भण्डारी बराललाई तत्काल पक्राउ गर्नुपर्ने र यस अवैध कार्यमा संलग्न डाक्टरहरूलाई कानुनी कारबाही गर्नुपर्ने माग राखेका छन्।

‘होप फर्टिलिटी’ लगायतका केन्द्रहरूमा डिम्ब तस्करीमा संलग्न चिकित्सकहरूको मेडिकल लाइसेन्स खारेज गरी मुद्दा चलाउनुपर्ने उनीहरूको माग छ।

प्रदर्शनमा डिम्ब तस्करीविरुद्ध लामो समयदेखि अभियान चलाउँदै आएका युवा अभियन्ता किरण बिक अनुसार पहुँच र शक्तिको दुरुपयोग गरेर अपराधी उम्काउन खोजिएकाले प्रदर्शन गरिएको हो ।

प्रदर्शनका क्रममा आन्दोलनकारीहरूले गम्भीर आरोप लगाउँदै पूर्वमहान्यायाधिवक्ता सबिता भण्डारी बराल सरकारमा महान्यायाधिवक्ता नियुक्त भएपछि शक्तिको दुरुपयोग गरी आफ्नो मुद्दा आफैँ खारेज गराएको दाबी गरेका छन्।

बिकले डिम्ब तस्करीमा संलग्न पूर्वमहान्यायाधिवक्ता सबिता भण्डारी बराल र संलग्न डाक्टरहरूमाथि फौजदारी अभियोग दर्ता भई कानुनी कारबाही अघि नबढेसम्म आन्दोलन निरन्तर जारी रहने चेतावनी दिए ।