काठमाडौं । फागुन २१ गते हुने प्रतिनिधि सभा सदस्य निर्वाचनका लागि झापा–३ मा राष्ट्रिय स्वतन्त्र पार्टीका उम्मेदवार बालेन शाहले आफ्नो घोषणापत्र सार्वजनिक गरेका छन् ।

घोषणापत्र सार्वजनिक गर्दै उनले आफू सङ्घीय सांसद भएको हैसियतले बेथिति र भ्रष्टाचार विरुद्ध संसद्को अग्र पङ्क्तिमा उभिने बताएका छन् ।

राष्ट्रिय नीति तथा बजेटमा झापा–५ का विकासका मुद्दाहरू सशक्त रूपमा उठाउने र सम्बन्धित मन्त्रालयसँग समन्वय गरी सङ्घ, प्रदेश र स्थानीय तहका विकास योजनाको प्रभावकारी अनुगमन गर्ने उनको प्रतिबद्धता छ ।

उनले स्थानीय जनताको समस्या तथा आवाज संसद्मा निरन्तर रूपमा प्रस्तुत गर्ने, नेपाल सरकार र जेनजीबीच भएका सम्झौताको पूर्ण, पारदर्शी र समयमै कार्यान्वयन सुनिश्चित गर्ने र स्थानीय तथा प्रदेश सरकारका योजनाहरू सङ्घीय तहबाट छिटो, सहज र परिणाममुखी रूपमा कार्यान्वयन हुने वातावरण सिर्जना गर्ने उल्लेख गरेका छन् ।

बालेनले राष्ट्रिय स्वतन्त्र पार्टीको वाचा पत्र २०८२-थिति बसाल्ने सङ्कल्प कार्यान्वयन को नेतृत्व गर्ने प्रतिबद्धता व्यक्त गरेका छन् ।
उनले नेपालको संविधानले सुनिश्चित गरेका गाँस, आवास, स्वास्थ्य, शिक्षा, खानेपानी, रोजगारी, सामाजिक सुरक्षा र स्वच्छ वातावरण जस्ता आधारभूत आवश्यकता सबै नागरिकसम्म व्यवहारिक रूपमा पुर्‍याउन आवश्यक कानुन, बजेट र प्रभावकारी कार्यान्वयन सुनिश्चित गरी राष्ट्र हित विपरीत कुनै पनि सम्झौता नगर्ने अठोट गरेका छन् ।

झापा ५ मा व्यवस्थित संसद् सचिवालय स्थापना गरी स्थानीय सरोकारलाई सम्बोधन गर्ने, मेरो राजनीति सेवा, इमानदारिता र परिणाममा आधारित ,गरिब तथा विपन्न परिवारका बालबालिकाले पनि गुणस्तरीय शिक्षा पाउनुपर्ने अधिकार व्यवहारमै सुनिश्चित गरिने, काठमाडौं महानगरमा लागू भएजस्तै शिक्षामा सीप कार्यक्रम कार्यान्वयन गरी विद्यार्थीहरूको विदेश जान पर्ने बाध्यतालाई न्यूनीकरण गरिने, गौरीगञ्जस्थित ऐतिहासिक त्रिभुवन पुस्तकालय पुनर्निर्माण गरी डिजिटल अध्ययन अनुसन्धान केन्द्रका रूपमा सञ्चालन गर्ने प्रतिबद्धता व्यक्त गरेका छन् ।

दमक-रवि चिसापानी सडक यथाशीघ्र सम्पन्न गरी सञ्चालनमा ल्याइने, ‘हाम्रो रङ्गशाला, हाम्रै पहिचान’ को भावना अनुरूप आदिवासी जनजातिको संस्कृति र इतिहास झल्किने ‘आदिवासी जनजाति रङ्गशाला‘ निर्माण गरिने र विराट बुद्ध पार्कको निर्माण कार्य सम्पन्न गरी सञ्चालनमा ल्याइने प्रतिबद्धता पत्रमा उल्लेख छ ।

यसै गरी, कृषि तथा रोजगारी क्षेत्रमा कनकाई-रतुवा सिँचाइ योजना विस्तार तथा लिफ्ट सिँचाइ प्रविधि प्रयोग गरी कृषियोग्य जमिनको उपयोगिता बढाइने, प्रत्येक पालिकामा श्रम बैङ्क अवधारणा लागू गरिने र कोल्ड स्टोर तथा ड्रायर एकै स्थानमा रहने गरी ‘गौरादह कृषि भण्डारण केन्द्र’को स्थापना गर्ने बताए ।

उनले आमाको नामबाट नागरिकता लिँदा हुने झन्झटिलो प्रक्रियालाई सरलीकृत गरिने, कृषिमा महिलालाई प्रोत्साहन गर्न र महिला कृषि कर्जा कार्यक्रम’मार्फत सहुलियत दरमा वित्तीय पहुँच सुनिश्चित गरिने, सीपमूलक तालिममार्फत अपाङ्गता भएका व्यक्ति र एकल महिला लक्षित रोजगारी प्रवर्द्धन कार्यक्रम सञ्चालन गर्ने बाचा गरेका छन् ।

यस्तै, पर्यटन तथा उद्योग क्षेत्रमा गौरीगञ्ज भन्सारलाई व्यवस्थित र पारदर्शी ढङ्गले सञ्चालन गरिने प्रबन्ध मिलाइने र सीमावर्ती पर्यटन विकास योजना कार्यान्वयन गर्ने उनले उल्लेख गरे ।

खेलकुदतर्फ राष्ट्रिय तथा अन्तर्राष्ट्रिय स्तरका खेलाडी र प्रशिक्षक उत्पादन गर्ने उद्देश्यसहित बहु आयामिक खेलकुद एकेडेमी निर्माण गरिने दमक गोल्ड कपलाई व्यावसायिक, राष्ट्रिय र अन्तर्राष्ट्रिय स्तरमा प्रवर्द्धन गरी झापा ५ को अर्थतन्त्र, पर्यटन र खेलकुद क्षेत्रको समग्र विकासमा योगदान पुयाइने र खुल्ला खेल मैदानहरूलाई संरक्षण तथा आवश्यकता अनुसार स्तरोन्नति गरिने घोषणा उनले गरे ।

स्वास्थ्यतर्फ गरिब तथा विपन्न परिवारले स्वास्थ्य उपचार पाउनु पर्ने अधिकार व्यवहारमै सुनिश्चित गरिने ,अस्पतालमा उपचारका लागि आउने विपन्न, असहाय, बेवारिसे बिरामीका लागि कुल शैयाको दश प्रतिशत शैया छुट्टाई निःशुल्क उपचार अनिवार्य रूपमा उपलब्ध गराउनु पर्ने कानुनी व्यवस्था सशक्त रूपमा कार्यान्वयन गरिने, दमक अस्पताललाई पहिलो चरणमा तीन सय शैयाको अस्पतालका रूपमा स्तरोन्नति गरिने लगायतको प्रतिबद्धता उनको छ ।