काठमाडौं। प्रधानमन्त्री सुशीला कार्कीले आज विभिन्न देशका कूटनीतिज्ञ (राजदूत)सँग छलफल गर्दैछिन्।

नेपालको वर्तमान अवस्थाबारे ‘ब्रिफिङ’ गर्न उनले कूटनीतिक निकायका प्रमुख एवं प्रतिनिधिहरुलाई बैठक बोलाएकी हुन्।

प्रधानमन्त्रीको सचिवालयका अनुसार आज दिउँसो साढे २ बजे सिंहदरबारमा बैठक बस्नेछ। बैठकमा नेपालस्थित सबै कूटनीतिक निकायका प्रमुखहरू एवं नेपालस्थित विदेशी राजदूतहरूलाई बोलाइएको छ।

बैठकमा नेपालको समसामयिक अवस्थाका साथै अन्तरिक सरकारले २१ फागुनमा तोकेको प्रतिनिधि सभा निर्वाचनलगायतका बारेमा छलफल, परामर्श र ब्रिफिङ हुनेछ।

प्रधानमन्त्री नियुक्त भइसकेपछि प्रधानमन्त्री कार्कीले यसप्रकारको बैठक पहिलो पटक बोलाएकी हुन्। मिति नजिकिँदै गर्दा प्रधानमन्त्री कार्कीलाई निर्वाचनको वातावरण बनाउन चुनौती छ। उनले मन्त्रिपरिषद्लाई पनि पूर्णता दिन सकिरहेकी छैनन्।

यसअघि निर्वाचन आयोगले भने राजनीतिक दलहरुसहित छलफल गरेको थियो। तर, सरकारका तर्फबाट भने निर्वाचनको वातावरण बनाउन नसकेको भन्दै आलोचना भइरहेको छ।