काठमाडौं । अष्ट्रेलियामा जारी टी–२० अभ्यास खेलमा स्थानीय क्यापिटल टेरिटोरी (एसिटी)विरुद्ध नेपालले लगातार दोस्रो जित निकालेको छ ।

मङ्गलबार भएको खेलमा नेपालले एसिटीलाई ६ विकेटले हराएको हो । यसअघि मङ्गलबार नै भएको पहिलो खेलमा नेपालले एसिटीलाई ४१ रनने हराएको थियो । दोस्रो खेलमा जितका लागि ९७ रनको लक्ष्य पछ्याएको नेपालले १३.२ ओभरमा चार विकेटको क्षतिमा लक्ष्य पूरा गरेको थियो ।

नेपालका लागि दीपेन्द्रसिंह ऐरीले अविजित ४२ रन बनाए । यस्तै गुलसन झाले २३ र आरिफ शेखले अविजित ११ रन बनाए। बलिङमा एसिटीका इसाम रहमानले दुई तथा लुइस इभन्स र देव दुबेले एक-एक विकेट लिए ।

यसअघि टस हारेर पहिले ब्याटिङको निम्तो पाएको एसिटी १७.२ ओभरमा सवै विकेटको क्षतिमा ९६ रन बनाएको थियो । एसिटीका लागि निक ब्रोएसले १६ रन बनाए । ज्याक केओघ, मिकी म्याकनमारा र टम होगनले १५/१५ रन बनाए । जेक स्मिथले १० रन जोडे ।

बलिङमा नेपालका लागि दीपेन्द्रसिंह ऐरी र शाहब आलमले चार-चार तथा कप्तान रोहितकुमार पौडेल र गुलसन झाले एक एक विकेट लिए ।