काठमाडौं । चलचित्र माग्ने राजाको प्रिमियर सम्पन्न भएको छ । शुक्रवार काठमाडौंमा एक कार्यक्रमबिच प्रिमियर सम्पन्न भएको हो ।

यही भदौ ६ गतेबाट प्रदर्शनमा आएको चलचित्रको प्रिमियर शोपछि पत्रकारहरूसँग कुरा गर्दै अभिनेता केदार घिमिरेले सुरुका दिनदेखि चलचित्रबारे प्रचार प्रसार र माया गर्नेहरूप्रति आभार व्यक्त गरे ।

अभिनेत्री वर्षा सिवाकोटीले सामाजिक सञ्जालभर माग्ने राजाको चर्चा रहेको भन्दै खुसी प्रकट गरिन् । सबैले राम्रो प्रतिक्रिया दिनुभएको उनले बताइन् ।

चलचित्र ऋषि लामिछानेको निर्देशनमा बनेको हो । एक गाउँले साधारण युवाको धनी बन्ने सपनाको कथावस्तुमा चलचित्र बनेको छ ।

चलचित्रमा  ‘माग्ने राजा’ लाई गरिबीमा पनि चरम, धनाढ्य पनि चरम रूपमा देखाइएको छ। कहिले रिन तिर्न नसकेर भागिरहेको माग्ने, कहिले पैसाको बिटो फ्याक्ने माग्ने। १५ सय मागेर काठमाडौं छिरेको माग्ने अरबपति हुँदै सबै सकिएर १५ सय मागेर गाउँ फर्किने पनि माग्ने ।

माग्नेको चरित्र उत्कृष्ट छ । फिल्ममा वर्षा सिवाकोटीलाई फरक लुक्समा देखाएर निर्देशकले आफ्नो क्षमता भरपुर प्रयोग गरेका छन् ।

चलचित्रले मुलुकको सामाजिक, आर्थिक र राजनीतिक परिस्थितिको व्यङ्ग्य गरेको छ । आरम्भ प्रोडक्सनको ब्यानरमा निर्माण भएको चलचित्रका प्रस्तुतिकर्ता तथा निर्माता मुनाल घिमिरे हुन् । नरेन्द्र मैनालीले खिचेको चलचित्रमा अभिनेत्री वर्षा सिवाकोटी र अभिनेता आर्यन सिग्देलको पनि विशेष भूमिका छ । चलचित्रलाई सामिप्यराज तिमल्सिनाले लेखेका हुन्।