शिक्षक महासंघले सार्वजनिक गर्यो आन्दोलनका कार्यक्रम
नागरिक प्रेस ६ भदौ २०८२
काठमाडौं । नेपाल शिक्षक महासंघले आफ्ना माग सम्बोधन नभएको भन्दै फेरि आन्दोलन गर्ने चेतावनी दिएको छ।
शुक्रबार काठमाडौंमा आयोजित पत्रकार सम्मेलनमा महासंघका अध्यक्ष लक्ष्मीकिशोर सुवेदीले अबको आन्दोलन विगतको भन्दा अझै सशक्त र दबाबपूर्ण हुने दाबी गरे।
सुवेदीले भने, ‘अबको आन्दोलन हिजोको भन्दा कडा र दबाबपूर्ण हुन्छ। सरकारसँग गरेको २७ बुँदे सहमति नै हाम्रो बटमलाइन हो, तर सरकारले माग पूरा गरेको छैन।’
शिक्षा विधेयक संसदीय समितिबाट पारित भएपछि असन्तुष्टि जनाउँदै महासंघले आफ्नो धारणा सार्वजनिक गरेको हो।
अध्यक्ष सुवेदीका अनुसार अब तय भएका आन्दोलनका कार्यक्रमहरु यस्ता छन्:
भदौ ९ : प्रधानमन्त्री, शिक्षामन्त्री र दलका प्रमुख सचेतकलाई ध्यानाकर्षण पत्र बुझाइने ।
भदौ ११-२०: केन्द्रमा रहेका सबै राजनीतिक दलका कार्यालयमा ध्यानाकर्षण पत्र बुझाइने र त्यहीँ २ घण्टा प्रतिनिधिमूलक धर्ना ।
भदौ १३: सबै पालिकामा ध्यानाकर्षण पत्र बुझाउँदै २ घण्टा धर्ना ।
भदौ १५: सबै जिल्लाका समन्वय एकाइमा प्रतिनिधिमूलक धर्ना ।
भदौ २१: दोस्रो चरणको आन्दोलन कार्यक्रम सार्वजनिक, जसमा अवधारणात्मक विरोध प्रदर्शनसहित थप कडा कदम हुने ।
