‘पूर्ण छात्रवृत्ति’ हटाइनुपर्ने मागसहित निजी विद्यालय सञ्चालकद्वारा आन्दोलनको घोषणा
नागरिक प्रेस ४ भदौ २०८२
काठमाडौं । निजी विद्यालय सञ्चालक संगठनहरू नेशनल प्याब्सन र प्याब्सनले संयुक्त रूपमा ५ बुँदे माग अघि सार्दै आन्दोलनको घोषणा गरेका छन्। बुधबार राजधानीमा संयुक्त पत्रकार सम्मेलन गर्दै दुवै निजी विद्यालय सञ्चालक संस्थाले आन्दोलनको घोषणा गरेका हुन् ।
प्याब्सनका अध्यक्ष कृष्णप्रसाद अधिकारी र नेशनल प्याब्सनका अध्यक्ष सुभाष न्यौपानेको हस्ताक्षर विज्ञप्तिमा भदौ ५ गते बिहान ११ देखि १ बजेसम्म माइतीघर मण्डलादेखि नयाँबानेश्वर चोकसम्म प्रिन्सिपलहरूले ब्यानरसहित र्याली गर्ने र कोणसभा गर्ने, भदौ ६ गते देशभर स्कुल बस उतारेर नगर परिक्रमा गर्ने तथा काठमाडौंको चक्रपथ वरिपरि कालो झन्डा/ब्यानरसहित र्याली गर्ने कार्यक्रम रहेको छ ।
उनीहरूले आफूहरूको अस्तित्व र योगदानलाई उपेक्षा गर्ने गरी विधेयकमा अव्यवहारिक र अन्यायपूर्ण प्रावधान राखिएको दाबी गर्दै तिनको खारेजी तथा संशोधनको माग गरेका छन्। उनिहरुले’पूर्ण छात्रवृत्ति’ भन्ने शब्द हटाइनु पर्ने माग गरेका छन् ।
विद्यालयमा उत्पादन नहुने पोसाक, स्टेशनरी, शैक्षिक सामग्री, खाजा जस्ता वस्तु उपलब्ध गराउनुपर्ने प्रावधान खारेज गर्नुपर्ने, कम्पनी ऐनअनुसार दर्ता भई सञ्चालनमा रहेका विद्यालयलाई गैर नाफामूलक’ बनाउँदै लगिने प्रावधान हटाइनु पर्ने लगायतका माग उनिहरुले गरेका छन् ।
यस्तै छात्रवृत्ति वितरणको अधिकार सम्बन्धित विद्यालयमै रहनुपर्ने, तर पालिका प्रतिनिधिको सहभागितामा पारदर्शी समिति बनाएर वितरण गर्न सकिने व्यवस्था गर्नुपर्ने, ४५% आरक्षणसहितको प्रावधान खारेज गर्नुपर्ने निजी विद्यालय सञ्चालकहरूको माग छ ।
