यो सरकार अधिनायकवादतर्फ गयो: माओवादी (भिडियो)
नागरिक प्रेस ३ भदौ २०८२
काठमाडौं । प्रमुख प्रतिपक्ष दल नेकपा (माओवादी केन्द्र)ले सरकार अधिनायकवादतर्फ गइरहेको निष्कर्ष निकालेको छ ।
मंगलबार पार्टी केन्द्रीय कार्यालय पेरिस डाँडामा बसेको पार्टीको सचिवालय बैठकले यस्तो निष्कर्ष निकालेको हो ।
बैठकमा पार्टी अध्यक्ष पुष्पकमल दाहालले सरकारका काम,कारबाहीबारे संक्षिप्त जानकारी गराएको पार्टीका प्रवक्ता अग्निप्रसाद सापकोटाले बताए ।
उनले सरकार झनझन अधिनायकवाद, तानाशाहीकरणतिर गइरहेको माओवादीको निष्कर्ष रहेको बताए । सरकारको कामबाट जनता धेरै रुष्ट र आक्रोशित भएको उनले बताए ।
उनले भने, ‘अहिलेको परिस्थितिबारे अध्यक्षजीले संक्षिप्त अपेडेट गराउनु भयो । सरकार झनझन अधिनायकवाद, तानाशाहीकरणतिर जाँदैछ । राज्यका सबै संरचनामाथि तिब्र हस्तक्षेपको प्रक्रिया अघि बढिरहेको छ । यो सरकारको नालायकी, कुशासनले गर्दा जनता असाध्यै रुष्ट, आक्रोशित छन् । स्थायी कमिटी बैठकले गरेका निर्णय कार्यान्वयनका लागि योजना र कार्यक्रम बनाउने, केही सांगठनिक कुराहरु थिए । भोलि केन्द्रिय कार्यालयमा पदाधिकारी बैठक बस्दैछ ।’
उनले यो सरकारले देश, जनताको हित विपरित गलत कदम चालेर अघि बढेको बताए ।
उनले भने, ‘प्रतिनिधि सभाको उपसभामुखलाई हटाउन पहिला नै कोशिस गरिरहेका थिए, अहिले हस्ताक्षर नै गरिरहेको भन्दे खबर आएको छ । भूमि विधेयकमा आफ्ना मान्छेलाई जग्गा बाँड्न अनेक प्रपञ्च गरिरहेका छन् । शिक्षा विधेयक अहिलेसम्म अड्किरहेको छ । राष्ट्रिय जीवनका सबै क्षेत्रमा अधोगतितिर यो सरकार गइरहेको छ । यो सरकारको अलोकतान्त्रिक र अधिनायकवादी चरित्रले गर्दा व्यवस्थामै असर परिरहेको छ । व्यवस्था विरोधीलाई अवसर प्रदान गरेको जस्तो भइरहेको छ । यो परिस्थिति दिन प्रतिदिन जनताको हित विपरित गइरहेको छ । भ्रष्टाचारमा कुरा गर्दा अरु पार्टीलाई छानीछानी अख्तियार लगाउने, जेल हाल्ने, आफ्नालाई हर तरहले बचाउने गरिरहेको छ । जनतालाई भ्रम पार्न सरकार तल्लिन भइरहेको छ ।’
सापकोटाले सरकारको अलोकतान्त्रिक र अधिनायकवादी चरित्रले गर्दा व्यवस्थामै असर परिरहेको जिकिर गरे ।
