कर्मचारीकै कारण ३ वर्षमा हुने काम ६ वर्षमा पनि हुँदैन: उपप्रधानमन्त्री सिंह (भिडियो)
नागरिक प्रेस २ भदौ २०८२
काठमाडौं । उपप्रधानमन्त्री एवं शहरी विकासमन्त्री प्रकाशमान सिंहले मन्त्रालयका कर्मचारीहरुको कार्यशैलीप्रति असन्तुष्टी जनाएका छन् ।
सोमवार मन्त्रालयमा आयोजित शहरी विकासमन्त्री सिंह र सचिव गोपालप्रसाद सिग्देलबीचको कार्यसम्पादन सम्झौता कार्यक्रममा उनले कर्मचारीहरुले काम गर्नमा ढिलासुस्ती गर्ने गरेको बताए ।
संस्थागत स्वामित्व लिएर कर्मचारीहरुले काम नगरिदिँदा धेरैजसो काममा ढिलासुस्ती हुने गरेको उनले बताए । ऐन, नियम, कानून, नियमावलीअनुसार गर्नुपर्ने निर्णय गर्न पनि कर्मचारीहरुले समयमा नै नगरिदिने गरेको उनको भनाई छ ।
कर्मचारीहरुकै कारण कतिपय कामहरु ३ वर्षमा सक्नुपर्नेमा ६ वर्ष लाग्ने, २ वर्षमा हुने काम ४ वर्षमा समेत नहुने गरेको उनले बताए । उनले कानूनअनुसार गर्नुपर्ने काममा ढिलासुस्ती गर्ने, आलटाल गर्ने काम नर्गन कर्मचारहरुलाई निर्देशन दिए ।
उनले भने, ‘यहाँ मैले के देखिरहेको छु भने हाम्रो जुन संस्थागत रुपमा स्वामित्व लिएर संस्थालाई अगाडी बढाउने काममा चाहीँ तपाईंहरुको त्यसमा कमीकमजोरी देखिएको छ । मन्त्रालयबाट हामीले काम गर्ने भनेको जनताको सेवाको लागी हो । जनताको सेवा गर्नको लागी मन्त्रालय गठन भएको हो । सेवामा नै हामीले अनावश्यक रुपमा ढिलासुस्ती गर्न थालेपछि गाह्रो त हुने भयो नी । यहाँ मैले देखेको तपाईहरुको जुन जुन यो प्रोजेक्टमा नेतृत्व गरिरहेकाहरु होस् या विभागको या सबै ठाउँमा निर्णय गर्नुपर्ने ठाउँमा समयमा नै निर्णय गर्नुपर्यो ।’
उनले निर्णय गर्दा ऐन, नियम र निर्देशिका अनुसार गर्न निर्देशन दिए ।
उनले भने, ‘यहाँ मैले गरेपछि केही हुन्छ की भनेर । खाली आफ्नो मात्रै कुरा गरेर हुन्छ, यहाँ । यहाँ कर्मचारीहरुले पनि निर्वाह गर्नुपर्ने दायित्व पूरा गर्नुपर्यो नी । कहीँ आपत छ भने के मा अष्पष्ट छ, आफु भन्दा माथीकोलाई खबर गर्ने, सहकार्य त हुनुपर्यो नी । फेरि यो नेपालको विकास निर्माणसंग सम्बन्धित मन्त्रालय पनि भएको कारणले गर्दा सबैले हेरिरहेका हुन्छन् । ३ वर्षमा सक्नुपर्ने ५/६ वर्ष भइसक्यो भएको छैन । २ वर्षमा सक्नुपर्ने ३/४ वर्ष भइसक्यो भएको छैन । भनेपछि त कामै यो सरकारले गर्न नसक्ने हो की भन्ने खालको किन भईरहेको छ भने सबैले सरकारको कर्मचारी भएपछि आफ्नो जिम्मेवारीअनुसार ऐन कानुन, नियम, निर्देशिकाअनुसार गर्नुपर्ने निर्णय गर्नपर्यो नी त्यो नगरेर आलटाल गर्ने, ढिलासुस्ती गर्ने, त्यहाँबाट सरुवा भएर अरुलाई थुर्पादिर्ने त्यसो गरेर हुँदैन है । सबैले गनुपर्ने काम त गनुपर्यो नी त ।’
उनले जनतालाई परिणाम दिनेगरी काम गर्ने निर्देशन दिए । गएको एक वर्षमा राम्रो काम नभएको भन्दै उनले चालु आर्थिक वर्षमा जनतालाई महसुस हुनेगरी काम गर्न आग्रह गरे।
