अस्थिरताका रोगीहरू सरकार ढल्ने हल्ला चलाउँछन्: शंकर पोखरेल

महेन्द्रनगर । नेकपा एमालेका महासचिव शंकर पोखरेलले अस्थिरताको रोग लागेकाहरूले सरकार ढल्ने हल्ला चलाउने गरेको बताएका छन् ।
सोमबार प्रेस चौतारी नेपालले कञ्चनपुर समितिमा आयोजना पत्रकार सम्मेलनमा उनले ८४ को चुनावसम्मै यो गठबन्धन निरन्तर रहने बताए ।
उनले भने,‘दुई ठुला दल मिलेर सरकार बनेको छ, स्थिरता देखिएको छ । तर, अस्थिरताको रोग लागेकाहरू सरकार आज ढल्छ, भोलि ढल्छ भन्दै हल्ला चलाइरहेका छन् । उनीहरू अस्थिरताका रोगी हुन्।’
कांग्रेस नेता शेखर कोइरालालाई लक्षित गर्दै उनले एकातिर सत्तामा हिस्सेदारी खोज्ने र अर्कोतर्फ सरकारको विरोध गर्दै हिँड्नु अनैतिक भएको बताए ।
सरकारले सूचनाको हक कुण्ठित हुने कुनै पनि खालको कानून नल्याउने प्रष्टीकरण दिँदै उनले भने, ‘संसद्ले सूचनाको हक कुण्ठित हुने कुनै कानून बनाउँदैन, हामीले यही विश्वास गर्नुपर्छ । अहिले स्वतन्त्रताका नाममा अराजकता बढेको छ, त्यसलाई नियन्त्रण गर्न खोजिएको हो, संविधानसँग बाझिने कुनै कानून बन्दैन ।’