काठमाडौँ । रामप्रसाद राई स्मृति प्रतिष्ठान केन्द्रीय समितिद्वारा ७४ औँ मुक्तिदिवसका अवसरमा विचार-गोष्ठी तथा सम्मान समारोहको आयोजना सम्पन्न गरेको छ । समितिले सोमबार नेपाल प्रज्ञा–प्रतिष्ठानमा एक कार्यक्रम गरि विचार तथा गोष्ठी कार्यक्रम राखेको थियो ।

समारोहका प्रमुख अतिथि तथा पूर्वपरराष्ट्रमन्त्री प्रदीप ज्ञवाली नेपालमा गणतन्त्र हरेक किसिमले उत्तम व्यवस्था भएको बताए । उनले गणतन्त्रमा जनताका अपेक्षाअनुसारका काम हुन नसकेको बताउँदै गणतन्त्रको रक्षा गर्नु यसलाई अझै सशक्त बनाउनुको विकल्प नरहेको बताए । उनले कतिपय पात्रहरुको कारणले गणतन्त्रमा सही शासन हुन नसकेको बताए ।

उनले भने, “नेपामा राजतन्त्र र प्रजातन्त्र सँगसँगै जान नसक्ने इतिहाँसले पुष्टि गरेको छ । नेपाली इतिहासले के देखायो भने राजतन्त्र र प्रजातन्त्र सँगसँगै जानसक्ने रहेनछन् । राजतन्त्रका अनिवार्य नियति भनेकै कुर्सीमा बसिसकेपछि ऊ निरंकुश हुन खोज्छ, प्रजातन्त्रमाथि धावा बोल्न खोज्छ, एक न एकदिन उसले प्रजातन्त्र डस्छ भन्ने निष्कर्षका साथ नै हामी गणतन्त्रमा पुगेका हौँ र यसमा हामीलाई गर्व छ । हो, गणतन्त्रले भनेजस्तो गरी डेलिभरी दिन नसकेको होला । कतिपय पात्रहरुको कारणले जस्तो शासन व्यवस्था हुनुपर्दथ्यो, त्यो हुन नसकेको होला । जनताका अपेक्षाअनुसारका काम हुन नसकेका होलान् तर वास्तवममा गणतन्त्र हरेक किसिमले उत्तम व्यवस्था हो ।”

प्रतिष्ठानका केन्द्रीय अध्यक्ष कर्ण घलेको सभापतित्वमा भएको कार्यक्रममा भोजपुरका संघीय सांसद माननीय हेमराज राईले २००७ साल मंसिर २४ गतेका दिन नारदमणि थुलुङको राजनीतिक नेतृत्व र रामप्रसाद राईको सैन्य नेतृत्वमा राणाहरूको हातबाट भोजपुरको मालअड्डा बिना रक्तपात नियन्त्रणमा लिएर जनताको शक्ति देखाएको दिनको स्मरणमा तत्कालीन भोजपुर जिल्ला विकास समितिको निर्णयअनुसार मंसिर २४ गतेलाई मुक्तिदिवसका रूपमा मनाउन थालेको र रामप्रसाद राई स्मृति प्रतिष्ठानको स्थापना भएपश्चात् काठमाडौँमा प्रतिष्ठानको आयोजनामा हरेक वर्ष मंसिर २४ गते मुक्तिदिवस मनाइने गरिएको बताए ।

कार्यक्रममा स्मृति प्रतिष्ठानका पूर्व उपाध्यक्ष तथा अन्वेषक रामकुमार बान्तावाले रामप्रसाद राईको जीवनी, व्यक्तित्व र योगदानबारे चर्चा गर्दै स्मृति प्रतिष्ठानको उद्देश्य र स्मृति प्रतिष्ठानले गरेका प्रमुख गतिविधिबारे प्रकाश पारेका थिए । यसै गरी इतिहासकार प्रा.डा. गोविन्दमान सिंह कार्कीले २००७ सालको क्रान्ति त्यसमा रामप्रसाद राईको योगदानका बारेमा आफ्ना विचार राखेका थिए ।

स्मृति प्रतिष्ठानकी उपाध्यक्ष इन्दिरा पोखरेलले स्वागत मन्तव्यका साथै प्रतिष्ठानको गतिविधिबारे पनि प्रकाश पारेकी थिइन् । कार्यक्रममा प्रमुख अतिथि ज्ञवालीद्वारा रामप्रसाद राईकी बुहारी कृष्णकुमारी राईलगायत विभिन्न व्यक्तित्वहरूलाई सम्मानपत्र, कदरपत्र र आजीवन सदस्यहरूलाई प्रमाणपत्र प्रदान गरिएको थियो ।