गृहमन्त्री र भिभिआइपीले महिला प्रहरीबाट सुरक्षा लिनुस्: न्यायाधीश मल्ल
नागरिक प्रेस ५ भदौ २०८२
काठमाडौं । सर्वोच्च अदालतकी न्यायाधीश सपना प्रधान मल्लले गृहमन्त्री र प्रहरी महानिरीक्षकलाई महिला प्रहरीबाट सुरक्षा लिन आग्रह गरेकि छिन् ।
नेपाल प्रहरीले बिहीवार आयोजना गरेको पहिलो महिला प्रहरी सम्मेलनमा न्यायधीश मल्लले भिभिआइपी र भिआईपीको सुरक्षामा महिला प्रहरी खटाउनुपर्ने बताइन् ।
महिलाहरु सुरक्षा दिन सक्षम छन् भनेर उदाहरण बनिदिन उनले गृहमन्त्री रमेश लेखक र प्रहरी महानिरिक्षक दीपक थापालाई आग्रह गरिन् । उनले नेपाल प्रहरीमा महिलाहरुको सहभागिता हुन लामो समय लागेको पनि बताइन् ।
उनले भनिन्, ‘प्रहरी भन्नासाथै शान्ति सुरक्षा दिने, अझ न्याय पालिकाको सदस्य पनि हो तपाईं, न्यायको पहिलो ढोका पनि हो तपाई । कुनैपनि अपराधिक घटनामा न्याय दिलाउने तपाईंहरु द्वार पनि हो । तर महिलाहरु यो द्वारबाट, यो संस्थाबाट, संरचनाबाट लामो समय सक्रिय र अर्थपूर्ण सहभागिताबाट बहिष्कृत थिए । बहिष्कृत यस अर्थमा थिए की किनेभने त्यहाँ एउटा गहिरो जरो गाडिएका यस्तो सोचहरु थिए जुन चाहीँ लैङ्गिक लघुताभाषमा आधारित थिए ।’
उनले पहिले सुरक्षा, सेना, कानुन कार्यन्वयन गर्ने निकायमा, अथवा न्यायका सिक्रीहरुमा महिलाहरुले काम गर्न सक्दैनन् भन्ने सोच रहेको बताइन् ।
उनले भनिन्, ‘महिलाहरु सक्षम छैनन् । महिलाहरुले गर्न सक्दैनन् । अझ झन प्रहरी र सुरक्षा फौजको कुरा आउँछ, महिलाको त बलै छैन । अनि यो व्यक्तिगत क्षमतालाई नहेरि लिङ्गका आधारमा सामुहिक रुपमा चाँही सक्दैनन् भन्ने अनुमानबाट हामीहरु अगाडी बढेका थियौँ । अनुमानको कुरा पनि कस्तो थियो भने शारिरीक रुपमा पनि असक्षम, भावनात्मक रुपमा पनि धेरै कमजोर हुन्छ भन्ने सोच । अनि प्रश्न मलाई गर्न म लाग्छ, परिवर्तन त धेरै भएको छ । परिवर्तन त धेरै भएको छ तर पूर्ण भएको छैन । के साँच्चै महिला शारिरिक रुपमा कमजोर हुन्छन् ? म यो प्रहरी सम्मेलनमा के निवेदन गर्न चाहन्छु भने मेरो सुरक्षामा त महिला पनि हुनुहुन्छ । अव यदी महिलाले सुरक्षा लिने वर्ग होईन दिने वर्ग पनि हो भने भिभिआईपी र भिआईपीको सुरक्षामा र विशेष गरेर आईजीपी र गृहमन्त्रीहरुले महिलाबाट सुरक्षा लिनुस्, तपाईंहरु उदाहरण बनिदिनुस् ।’
उनले पछिल्लो समय महिलाहरु धेरै क्षेत्रमा अगाडी बढिरहेको बताइन् । शुन्यबाट १२ प्रतिशतसम्म महिलाको सहभागीता प्रहरी र न्याय क्षेत्रमा पुगेको उनको भनाई छ । यो उपलब्धि पनि ठूलो भएको उनले बताइन् । उनले प्रहरीमा पनि महिला प्रमुख भएको हेर्ने चाहना रहेको बताइन् ।
