काठमाडौं । नेपाल विद्युत प्राधिकरणका कार्याकारी निर्देशक कुलमान घिसिङले मुलुकमा लोडसेडिङ हुँदा रमाउने जमातले नै लोडसेडिङ घोषणा भएको हल्ला फैल्याएको दाबी गरेका छन्।

शुक्रवार नेपाल पूर्वाधार पत्रकार समाजद्वारा अयोजित कार्यक्रममा बोल्दै लोडसेडिङ हुँदा रमाउने जमातले प्राविधिक रुपमा थोरै समस्या हुँदा बजारमा लोडसेडिङ घोषणा भएको हल्ला फैल्याएको दाबी गरेका हुन् ।

उनले अहिले लोडसेडिङ नभएर आयोजनाहरुमा आएको प्राविधिक कारणले केही घण्टा जलविद्युत वितरणमा समस्या भएको बताए ।

उनले भने,‘ नेपालमा नकारात्मकताको कति रमाउने रहेछन् । लोडसेडिङ भयो । लोडसेडिङ हुँदा कति खुशी मनाउने कति जमात रहेछ भन्ने एउटा जमात रहेको केही दिनबाट हेरिरहेको छु । विद्युत प्राधिकरण नाफा भयो भन्न साथ खुशी नहुने,विद्युत प्राधिकरण घाटा भयो भन्नासाथ खुशी हुने जमात पनि छ । नेगेटिभिटीको ठूलो जमात छ । यो देखाएर त्यो भित्रबाट कसरी आफूले कमाउने भन्ने पनि रहेछ । लोडसेडिङ भयो उद्योगमा डिजेल चलाउनु पर्‍यो । त्यसैले उद्योगबाट उत्पादन भएको वस्तुको मूल्य बढाएका पनि होलान् । विगतमा लोडसेडिङको बेलामा डिजेल नचाउँदा पनि २० देखि २२ घण्टा जनतालाई लोडसेडिङमा पारेर प्रयोग गरेको विद्युतबाट उत्पादित वस्तु मूल्य बढाएर बेचिसक्नु भयो । तर डेडिकेटेड ट्रंकलाइनको पैसा तिर्नु पर्दैन ।’

यस्तै उनले अहिले प्राविधिक कारणले दुई चार दिन समस्या हुँदा लोडसेडिङ घोषणा भयो भन्ने हल्ला बजारमा फैल्याइएको बताए ।

उनले भने, ‘त्यो जमातको हल्ला,लोडसेडिङ हुँदा रमाउने जमातले गरिरहेको छ । यो कदापी होइन । नेपालमा लोडसेडिङ हुँदैन । लोडसेडिङ भएको छैन । केही समयको लागि प्राविधिक समस्यो हो । पटक–पटक भनिरहेका छौं । माथिल्लो तामाकोशी बाढीले क्षति गरेको छ । त्यो बनाउन कसैले सहयोग गर्नुपर्दैन । कालिगण्डकी आयोजनाको एउटा युनिट बन्द छ । ५०० मेगावटको पिकिङ पावर प्लान्टहरु बन्द छ । त्यति गर्दा पनि हामीले लोडसेडिङ हुन दिएका छैनौं । बेलुकाको पीक समयमा केही समय विहानको पीक समयमा उद्योगहरुलाई कम चलाउन भनेका छौं ।’

उनले जलविद्युत आयोजनाको कारण सरकारले कल्पना गर्न नसक्ने ठउँमा बाटो पुगेको बताए। उनले उर्जाको विकासमा सामाजिक उत्तरदायित्वमा जोडेर जानुपर्ने बताए । उनले भारतबाट विद्युत आएन भने अझै लोडसेडिङ हुने अवस्था रहेको बताए ।