सभामुखको चुनाव चैत २२ गते हुने
नागरिक प्रेस १८ चैत २०८२
काठमाडौं । प्रतिनिधि सभामा सभामुख चयनका लागि निर्वाचन चैत २२ गते हुने भएको छ । बुधवार सिंहदरबारमा बसेको सर्वदलीय बैठकले उक्त निर्णय गरेको हो ।
बैठकले चैत २० गते उम्मेदवारी मनोनयन गर्ने र २२ गते निर्वाचन गर्ने कार्यतालिकामा सहमति जुटाएको राष्ट्रिय स्वतन्त्र पार्टीका महामन्त्री कविन्द्र बुर्लाकोटीले जानकारी दिए ।
उनकाअनुसार प्रतिनिधि सभाको बिहीबारको पहिलो बैठकमा सभामुखको निर्वाचनसम्बन्धी प्रस्ताव पेश हुनेछ ।
बैठकले नयाँ नियमावली नबन्दासम्म हालकै संसद् नियमावलीका आधारमा बैठक सञ्चालन गर्ने र पहिलो बैठकबाटै नियमावली प्रतिस्थापनको प्रक्रिया अघि बढाउने निर्णय गरेको पनि उनले बताए ।
साथै हाउसको पहिलो बैठकमा कार्यव्यवस्था परामर्श समिति गठन, बैठकको अध्यक्षता गर्ने सदस्यको चयन प्रक्रिया शुरु गरिनुका साथै शीर्ष नेताहरूले शुभकामना दिने कार्यसूचीमा सहमति जुटेको उनले बताए ।
उनले भने, “हाउसको पहिलो बैठक कसरी सञ्चालन गर्ने र के के कार्यसूची राख्नेबारेमा छलफल भयो । कतिपय कुराहरू हामी छलफलबाट टुङ्ग्याएर निस्किएका छौँ । सभा सञ्चालनको लागि आवश्यक संसद् नियमावलीलाई प्रतिस्थापन गर्ने सहमति भएको छ । तर नयाँ नियमावली नबन्दासम्म हाल रहेकै नियमावलीलाई टेकेर बैठक सञ्चालन गर्ने कुरा पनि भएको छ । यो सभाको पहिलो बैठकमै प्रस्ताव भएर अगाडि बढ्छ । सभामुखको निर्वाचनसम्बन्धी प्रस्ताव सभाको पहिलो बैठकमा प्रस्ताव हुने, २० गते मनोनयन गर्ने र २२ गते निर्वाचन गर्ने कार्यतालिकामा हामीले छलफल गर्यौं । बैठकमा कार्यव्यवस्था परामर्श समिति गठन र अध्यक्षता गर्ने सदस्यको चयन गर्ने कुरामा पनि छलफल भयो । त्यसैगरी प्रतिनिधि सभाको पहिलो बैठकबाट जेनजी आन्दोलनका शहीदहरुप्रति श्रद्धाञ्जली व्यक्त गर्ने कार्यसूची पनि राख्ने सहमति भयो । बैठकमा दलका शीर्ष नेताहरुले शुभकामना दिने कुराहरु पनि छ । त्यसमा समय निर्धारण गरेर अगाडि बढ्ने तयारी गरेका छौँ ।”
सभाको पहिलो बैठकमा गत भदौ अन्तिम साताको जेनजी आन्दोलनका शहीदहरुप्रति श्रद्धाञ्जली व्यक्त गर्ने कार्यसूची पनि रहेको छ ।
राष्ट्रिय प्रजातन्त्र पार्टीकी संसदीय दलकी प्रमुख सचेत खुम्बु ओलीले संसद्को नियमावली संशोधन गर्नेबारे सबै दलहरु सकारात्मक रहेको बताए ।
उनले कार्यव्यवस्था परामर्श समितिमा सबै दलको समान सहभागिता रहनुपर्ने आफ्नो पार्टीको धारणा रहेको पनि बताए । उनले संसद्मा राष्ट्रिय प्रजातन्त्र पार्टी समन्वय र सहकार्यसहित प्रभावकारी उपस्थिति जनाउने बताए ।
