काठमाडौं । राष्ट्रिय स्वतन्त्र पार्टी (रास्वपा) का वरिष्ठ नेता तथा झापा–५ का उम्मेदवार बालेन शाह मतदान गरेपछि आफ्नो निर्वाचन क्षेत्र झापा जान चढेको हेलिकोप्टर बीच बाटोबाटै काठमाडौं फर्किएको घटनाले यतिखेर विभिन्न टिकाटिप्पणीहरू भइरहेका छन् ।

बिहीबार काठमाडौंमा मतदान गरेपछि शाह आफ्नो निर्वाचन क्षेत्र झापा जाने तयारीमा हेलिकोप्टरमार्फत प्रस्थान गरेका थिए । तर उनी सवार हेलिकोप्टर झापामा अवतरण नगरी बीच बाटोबाटै काठमाडौं फर्किएको जानकारी आएको छ । हेलिकोप्टर अचानक काठमाडौं फर्किएपछि सामाजिक सञ्जाल र सञ्चार माध्यमहरुमा विभिन्न अड्कलबाजीहरु सुरु भएका छन् । केहीले अनुमति नलिई उडान भरेको भन्दै प्रश्न उठाएका छन् ।

यस विषयमा निर्वाचन आयोगकी सहायक प्रवक्ता सिता पुनसँग फोनमार्फत सम्पर्क गर्दा उनले अनुमति नलिएको भन्ने कुरा गलत हल्ला मात्र भएको बताइन् ।

‘उहाँको हेलिकोप्टर किन फर्कियो भन्नेबारे आयोगलाई जानकारी हुँदैन,’ पुनले भनिन्, ‘तर अनुमति नलिएको भन्ने कुरा हल्ला मात्रै हो । बुधबार बालेन जी आफैं आयोगमा आएर अनुमति लिनुभएको थियो ।’

हेलिकोप्टर किन बीच बाटोबाटै फर्कियो भन्नेबारे भने आधिकारिक कारण खुल्न बाँकी रहेको छ । यसैबिच आयोगले विज्ञप्ती मार्फत समेत बालेनले अनुमती लिएको जनाइसकेको छ ।

‘निर्वाचन आयोगले मिति २०८२ फागुन २१ गतेका लागि काठमाडौँ–झापा उडानका लागि हेलिकोप्टर प्रयोग गर्न अनुमति दिएको हो । आयोगले यस सम्बन्धमा पठाएको पत्रमा सो रुटमा मात्र हेलिकोप्टर प्रयोग गर्न पाइने उल्लेख गरिएको छ,’ विप्तीमा भनिएको छ ।

आयोगका अनुसार हेलिकोप्टर प्रयोग गर्दा लाग्ने सम्पूर्ण खर्चको छुट्टै अभिलेख राख्नुपर्ने र आयोगले माग गरेको अवस्थामा सो विवरण उपलब्ध गराउनुपर्ने व्यवस्था गरिएको छ । निर्वाचन खर्चको पारदर्शिता सुनिश्चित गर्न यस्तो व्यवस्था गरिएको आयोगले जनाएको छ ।