काठमाडौं । नेपालमा एचआइभी संक्रमितको संख्या ३४ हजार ३ सय ३७ जना रहेका छन् ।आईतबार विश्व एड्स दिवसको अवसरमा आयोजित अन्तरक्रिया कार्यक्रममा बोल्दै राष्ट्रिय एड्स तथा यौन रोग नियन्त्रण केन्द्रका निर्देशक डा. सर्वेश शर्माले यसबारे जानकारी गराएका हुन् ।

उनकाअनुसार कुल संक्रमितमध्ये १५ वर्ष भन्दा माथिका ३३ हजार २ सय ७९ जना रहेका छन् । त्यस्तै १५ वर्ष माथिका १४ हजार जना महिलाहरुमा एचआइभी संक्रमण छ ।

उनले १५ वर्ष भन्दा माथिका एचआइभी संक्रमित पुरुषहरुको संख्या १९ हजार २ सय ७९ रहेको बताए । १ हजार ५८ जना एचआइभी पोजेटिभ बालबालिकाहरु रहेका छन् ।

गत एक वर्षमा आमालाई एचआइभी परीक्षण गर्दा २ सय २७ जना बालबालिकाहरु संक्रमित फेला परेका छन् । सन् २००० देखि २०२४ सम्म आउँदा नयाँ संक्रमण पनि ७६ प्रतिशतले घटेको डा. शर्माले बताए।

सरदर दिनमा १.७ जना नयाँ संक्रमित थपिरहेका छन् भने दिनमा १ जनाको एचआइभीका कारण मृत्यु भइरहेको छ ।

डा. शर्माकाअनुसार ८८ प्रतिशत संक्रमितहरुले औषधिको सेवन गरिरेहा छन् । संक्रमितहरुमध्ये ७६ प्रतिशतले शरीरमा भाइरसको मात्रा कति छ भनेर परीक्षण गरिरहेको उनले बताए। आगामी १ वर्षभित्र एचआइभी संक्रमण विरुद्धको रणनीति बनाउनुपर्ने आवश्यकता रहेको उनको भनाइ छ ।