काठमाडौं । संयुक्त अरब इमिरेट्स (युएई)मा जारी एसीसी यु-१९ प्रिमियर कपको फाइनलमा नेपाल पुगेको छ । शनिबार भएको सेमिफाइनलमा मलेसियालाई ९ विकेटले हराउँदै नेपाल फाइनलमा प्रवेश गरेको हो । यससँगै नेपाल एसिया कपमा छनोट भएको छ ।

मलेसियाले दिएको ५२ रनको सामान्य लक्ष्य नेपालले ७.५ ओभरमा १ विकेटको क्षतिमा पूरा गरेको थियो । नेपालका लागि भन्स क्षेत्रीले २७ बलमा सर्वाधिक २३ रन बनाए भने निश्चल खत्रीले १८ बलमा १५ रन बनाउँदा ओपनर निरजकुमार यादव ४ रनमा आउट भएका थिए।

यसअघि युएईको अजमनमा टस हारेर पहिले ब्याटिङ गरेको मलेसियाले १७.२ ओभरमा सबै विकेटको क्षतिमा ५१ रन बनाएको थियो । मलेसियाको लागि हम्जाह पङ्गगीले २० बलमा सर्वाधिक १३ रन बनाए भने मोहमद फतुलले ११ रन बनाए।