सुनसरी । जेनजी आन्दोलनको क्रममा भदौ २४ गते सुनसरीको इलाका प्रहरी कार्यालय इटहरीको भवन र सवारी साधन तोडफोड गर्ने ५ जनालाई प्रहरीले पक्राउ गरेको छ । आन्दोलन आगजनी, लुटपाट तथा सुरक्षामा खटिएका प्रहरी कर्मचारीहरुलाई दुर्व्यवहार गर्ने उनिहरुलाई जिल्ला प्रहरी कार्यालय सुनसरीले पक्राउ गरेको छ ।

पक्राउ पर्नेमा सुनसरी इटहरी उप-महानगरपालिका-३ का २९ बर्षीय विजय लिम्वु, इटहरी-५ का ४४ बर्षीय दिपेन्द्र कुमार कार्की, इटहरी-८ का २४ बर्षीय आभाष कार्की, इटहरी-४ का २४ बर्षीय सोनम कार्की र भोजपुर याङपाङ्ग घर भई इटहरी-४ स्थितमा बस्दै आएका ४७ बर्षीय मदन खत्री रहेका छन् ।

घटनामा संलग्न व्यक्तिहरूलाई पहिचान तथा खोजतलास गर्ने क्रममा प्राप्त फोटो, भिडियो सिसिटिभी फुटेज र सामाजिक सञ्जालमा फैलिएका तस्बिर तथा भिडियोका आधारमा पहिचान गरी पक्राउ गरिएको हो ।

पक्राउ परेका उनिहरुको अपराधिक उपद्र गर्न नहुने कसुरमा सुनसरी जिल्ला अदालतबाट म्याद थप गरी अनुसन्धान भईरहेको छ । घटनामा संलग्न रहेका अन्य व्यक्तिहरुको खोजतलास भईरहेको छ ।

आगजनी तोडफोड र प्रहरीको हातहतियार लुटपाटमा संलग्न व्यक्तिहरुको फोटो तथा भिडियोहरु फेला परेमा तथा प्रहरीको हातहतियार लुकाई छिपाई राखेको भन्ने बुझिएमा नजिकको प्रहरी कार्यालयमा जानकारी गराई अनुसन्धान कार्यमा सहयोग गरी दिन कोशी प्रदेश प्रहरी अनुरोध गरेको छ।