काठमाडौं । किस्ट मेडिकल कलेज र उपचारको क्रममा मृत्यु भएकी सुत्केरी महिलाका आफन्तबीच सहमति भएको छ।

सहमति अनुसार अस्पतालले मृतकको उपचार हुँदा लागेको खर्च र शिशुको पेडियाट्रिक समयसम्म उपचार गर्दा लागेको खर्च छुट दिने भएको छ ।

जिल्ला प्रशासन कार्यालय ललितपुरमा सुरक्षा निकाय, अस्पताल र मृतक परिवारबीच भएको छलफलपछि सहमति भएको हो । नवजात शिशुको उपचार र अध्ययनका लागि सहयोग गर्ने सहमति गरिएको अस्पतालले जनाएको छ।

सहमतिपछि मृतकका परिवार तथा आफन्तले अस्पतालमा श्रद्धान्जली सभा गरेर शव बुझ्ने तयारी गरेका छन् ।

खोटाङ हलेसी तुवाचुङ नगरपालिका ९ की ३४ वर्षीया मिनाश्री राईको शुक्रबार राति मृत्यु नर्मल सुत्केरी हुँदा पनि रक्तस्राव भइ मृत्यु भएको थियो । मृत्यु पछि आक्रोशित मृतकका आफन्तले सोमबार अस्पताल तोडफोड गरेका थिए ।

आफन्तले भने चिकित्सकको लापरबाहीले सुत्केरीको मृत्यु भएको भन्दै प्रदर्शन गरेका थिए ।