काठमाडौं। प्रधानमन्त्री सुशीला कार्कीले नेपाली विद्यार्थी विपिन जोशीको निधनप्रति गहिरो शोक व्यक्त गर्दै उनिप्रति श्रद्धाञ्जली अर्पण गरेकि छिन्।

प्रधानमन्त्री कार्कीले मङ्गलबार वक्तव्य जारी गर्दै जोशीको आत्माको चिरशान्तिको कामना गर्दै भनिन्, ‘उहाँको त्याग र बहादुरीलाई राष्ट्रले कहिल्यै बिर्सने छैन।‘

उनले दुई वर्षदेखि बन्धकमुक्त हुने अटुट आशा र सामूहिक प्रार्थनाबीच आएको विपिनको मृत्युको समाचारले आफू स्तब्ध भएको बताइन्।

उनले भनिन्, ‘यो हृदयविदारक समाचारले हामी सबैलाई गहिरो पीडा दिएको छ। म यस कठिन घडीमा उहाँप्रति हार्दिक श्रद्धाञ्जली अर्पण गर्दछु र शोकाकुल परिवारजन तथा आफन्तहरूमा गहिरो समवेदना व्यक्त गर्दछु।‘

प्रधानमन्त्रीले विपिन जोशी केवल एक विद्यार्थी नभई विदेशमा अध्ययनरत हजारौं नेपाली युवाको उज्ज्वल प्रतिनिधि भएको उल्लेख गर्दै उनको जीवन उत्साह, लगनशीलता र सहयोगी स्वभावले भरिएको बताइन्। ‘उहाँ सकुशल फर्किएर नेपालको विकासमा योगदान दिनुहुनेछ भन्ने हाम्रो कामना थियो,‘ उनले भनिन् ।

प्रधानमन्त्री कार्कीले सदा शान्ति पक्षधर नेपालको छोरा विपिन जोशी अन्तर्राष्ट्रिय द्वन्द्वको अमानवीय सिकार बन्नुपरेको उल्लेख गर्दै उनले भनेकि छिन्, ‘उहाँको अपहरणपछि सरकार र सम्पूर्ण नेपाली जनता उहाँको सुरक्षित रिहाइका लागि एकचित्तले कामना गरिरहेका थिए। उहाँको निधनको यो खबरले हाम्रा दुई वर्षका सम्पूर्ण आशा र सपनाहरूलाई छिन्नभिन्न पारेको छ ।‘

प्रधानमन्त्रीले जोशीले बन्धक हुनुपूर्वका अन्तिम क्षणमा विपिनले देखाएको साहस, बहादुरी र त्यागका कारण कैयौं साथीहरूको ज्यान बचाउन सफल भएको जनाउँदै भनिन्, ‘उहाँको यो वीरतापूर्ण कार्य उहाँको जीवनको सबैभन्दा ठूलो विरासत हो, जसले उहाँलाई सधैँ नेपाली गौरवको प्रतीकका रूपमा जीवित राख्नेछ ।‘