जेनजी अभियन्तालाई निर्वाचन आयुक्तले भने, ‘निर्वाचन तोकिएको समयमै हुन्छ’
नागरिक प्रेस २४ असोज २०८२
काठमाडौं । कार्यवाहक प्रमुख निर्वाचन आयुक्त रामप्रसाद भण्डारीले फागुन २१ गते तोकिएको मितिमा निर्वाचन गराउन आफूहरु क्रियाशील रहेको बताएका छन् ।
शुक्रवार निर्वाचन आयोगको कार्यालयमा पुगेका जेनजी अभियन्ताहरुसँगको भेटमा उनले निर्वाचन तोकिएकै मितिमा सम्पन्न गराउन आयोग चौविसै घण्टा क्रियाशील रहेको बताए ।
कार्यवाहक प्रमुख निर्वाचन आयुक्त भण्डारीले निर्वाचन सम्पन्न गराउनका लागि आयोगले राजनीतिक दलहरु, नागरिक अगुवा, बुद्धिजीवि, पत्रकार लगायतका सरोकारवाला पक्षसँग विभिन्न माध्यामबाट छलफल गरिरहेको दाबी गरे ।
उनले भने, ‘निर्वाचन कसरी सम्पन्न गर्ने भन्ने सन्दर्भमा हाम्रो आयोग चौविसै घण्टा क्रियाशील छ । काम गरिराखेको छ । यहाँहरुले विभिन्न सञ्चार माध्यामहरुबाट पनि देखिरहनुभएको होला । निर्वाचन तोकिएको समयमा कुनैपनि हालतमा सम्पन्न गर्नुपर्छ । त्यो प्रयोजनका लागि राजनीतिक दल, सरोकारवाला, नागरिक समाजका अगुवाहरु, मानव अधिकारकर्मीहरु, बुद्धिजीविहरु, पत्रकारहरु, अझ विशेष गरेर राजनीतिक दल, सञ्चारकर्मी साथीहरुको विशेष भूमिका रहन्छ । र उहाँहरुसँग हामीले विविध तरिकाले छलफल गरिराखेका छौ ।‘
यस्तै उनले निर्वाचनको कार्यतालिका बनाएर त्यस अनुसार काम धमाधम काम भइरहेको बताए ।
उनले भने, ‘ निर्वाचनका कतिपय बाधा अड्चनहरु थिए । ती अध्यादेशमार्फत फुकाएर भएपनि हामीले मतदाताहरुको मतदाता नामावली संकलन गर्ने लगायतका विषयवस्तुहरु समावेश गरिसकेका छौं । त्यो कार्य सुचारु रुपमा अघि बढेका छन् । दैनिक रुपमा ठूलो मात्रामा छुट्नुभएका मतदाताहरु अहिले मतदाता नामावलीमा समावेश गर्न आइरहनुभएको छ । यसरी हामीले मतदाता शिक्षाको सन्दर्भमा सचेतनापूर्ण ढंगबाट शुरुदेखि नै कार्यक्रम सञ्चालन गरिराखेका छौं ।’
भण्डारीले सरकारले अध्यादेशमार्फत बाधा अड्काउ फुकाउने काम गरेपछि निर्वाचनको तयारीको कामले तिब्रता पाएको पनि स्पष्ट पारे । उनले निर्वाचनलाई निष्पक्ष रुपमा सम्पन्न गराउन पनि आयोग सचेत रहेको बताए ।
लोकप्रिय
