नेपालले पहिलो पटक यस्तो प्रधानमन्त्री पायो, जो देउवा, प्रचण्ड वा ओली होइन
काठमाडौं । राष्ट्रपति रामचन्द्र पौडेलले पूर्वप्रधान न्यायाधीश सुशीला कार्कीलाई प्रधानमन्त्री पदमा नियुक्त गरेसँगै नेपालको राजनीतिक इतिहासमा नयाँ अध्याय सुरु भएको छ।
निडर र कुशल न्यायमूर्तिका रूपमा चर्चित नवनियुक्त प्रधानमन्त्री सुशीला कार्की (७३), पूर्व मुख्य न्यायाधीश, सेप्टेम्बर १२ मा शपथग्रहण गर्दै नेपालको पहिलो महिला प्रधानमन्त्री बनेकी छिन्।
जेनजी अभियानको भदौ २३ र २४ गतेको आन्दोलनले नेपाली कांग्रेस र नेपाल कम्युनिस्ट पार्टी (एमाले) को गठबन्धनलाई सत्ता च्युत गरेपछि सङ्घीय लोकतान्त्रिक गणतन्त्र नेपालले प्रथम महिला प्रधानमन्त्रीका रूपमा कार्कीलाई प्राप्त गरेको छ।
दशकौँदेखि सत्तामा घुमिरहने देउवा, प्रचण्ड र ओलीजस्ता नेताबाट अलग, देशले पहिलो पटक कार्की नेपाली महिला आन्दोलनका सशक्त हस्तीलाई पछि पार्दै ४२ औँ प्रधानमन्त्रीमा नियुक्त भएकी छिन्।
यो क्षणमा सम्पूर्ण नेपालीलाई हार्दिक बधाई। साथै, सेप्टेम्बर ८ मा प्राण गुमाएका १९ सहिदप्रति श्रद्धाञ्जली। उनीहरूको बलिदानले नै आजको परिवर्तन सम्भव भएको महसुस गरिएको छ।
विगतका निराशा, आजको आशा
नेपालको संसदीय अभ्यासमा महिला मन्त्री भएको ६६ वर्षपछि कार्यकारी पद प्रधानमन्त्रीमा पहिलो महिला नियुक्ति भएकी छिन् सुशीला कार्की । नेपालले परिवर्तनको सपना धेरै पटक देख्यो, तर त्यो सपना पटक–पटक कुल्चियो र अधुरो रह्यो।
जनताका हातहरू निराशामा गले, आँखा आँसुमै भिजेका दिनहरू असङ्ख्य भए। तर आज, नयाँ नेतृत्व देख्दा हामी फेरि आशावादी भएका छौं। देशलाई बचाउन आमा आइपुगेकी छिन् भन्ने अनुभूति जनताको मनमा पलाएको छ।
सुशीला कार्कीको यात्रा
विराटनगरमा जन्मिएकी कार्कीले त्रिभुवन विश्वविद्यालय र बनारस हिन्दू विश्वविद्यालयमा अध्ययन गरिन्। सन् १९७९ मा कानुन व्यवसाय सुरु गरेकी उनले २०१० मा सर्वोच्च अदालतकी स्थायी न्यायाधीशको जिम्मेवारी सम्हालिन्।
जुलाई २०१६ देखि जुन २०१७ सम्म उनी नेपालकी पहिलो महिला मुख्य न्यायाधीश बनिन्। कार्यकालमा इम्पिचमेन्ट प्रस्तावसम्म ल्याइए पनि, जनदबाबले त्यो रोकियो र उनले अवकाशसम्म आफ्नो मर्यादा कायम राखिन्।
अब, न्यायिक जीवनपछिको अर्को अध्यायमा, उनी नेपालको पहिलो महिला प्रधानमन्त्री बनेकी छिन् । त्यो पनि देश संकटमा हुँदा।
आमा जस्तो नेतृत्वप्रति आशा
जनताको दृष्टिमा कार्की केवल प्रधानमन्त्री मात्र होइनन्, आमा पनि हुन् । जसले सबैलाई माया गर्छिन् । जसले धैर्य बोकेर अघि बढ्छिन् । जसले कसैलाई पनि पछाडि नपार्ने प्रतिज्ञा गर्छिन्।
जनताको आग्रह छ- यो नवजागरण कहिल्यै कमजोर नपारिइदिनुहोस्। किनकि अब देश तपाईंको काँधमा टेकेको छ।
नयाँ पुस्ताको सपना
‘ठुलो भएपछि के बन्न चाहन्छौ ?’ भन्ने प्रश्नमा अब नयाँ उत्तर आउँछ।
अस्ट्रेलिया, युके, अमेरिका, क्यानडा, जापान वा कोरियामा जान चाहन्छु भन्ने नेपाली विद्यार्थीहरूले पनि अब गर्वका साथ भन्न सक्नेछन् —
‘म प्रधानमन्त्री बन्छु, मन्त्री बन्छु, मेयर बन्छु।’
उनीहरूले नभने पनि, तपाईंले बाटो देखाइदिनुहुनेछ- ‘तिमीहरू पनि सक्छौ’ भन्ने आत्मबल।
निष्कर्ष
नेपालले पहिलो महिला प्रधानमन्त्री पाएको दिन केवल एउटा राजनीतिक घोषणा मात्र होइन, राष्ट्रकै आत्मामा आशाको पुनर्जन्म हो।
सपना कहिल्यै मर्दैन । केवल निदाउँछ।
आज, सुशीला कार्कीको आगमनसँगै निदाएको त्यो सपना फेरि जागेको छ।
अब सबै नेपालीको मनमा एउटै चाहना छ-
यो आशा कहिल्यै नटुटोस्।
यसपालि साँचिएकै नेपाल बन्ने छ, सबैले खोजेको नयाँ नेपाल आउने छ ।
