काठमाडौं । गृहमन्त्री रमेश लेखकले त्रिभूवन विश्वविद्यालयमा भइरहेको द्वन्द्व अन्त्य गर्न आग्रह गरेका छन् ।

आईतवार काठमाडौंमा आयोजित कार्यक्रममा उनले त्रिभूवन विश्वविद्यालयमा देखिएको द्वन्द्वमा गृह मन्त्रालय नै प्रवेश गर्नुपरेको बताए ।

उनले प्राध्यापकहरुको सुरक्षाको लागि पिएसओ खटाएको जानकारी दिए । गृह मन्त्रालयले खटाएको पिएसओ फिर्ता गर्ने वातावरण बनाउन पनि उनले आग्रह गरे। त्रिभूवन विश्वविद्यालयमा विभिन्न दलका भ्रातृसंस्थाले बन्द गर्ने, प्राध्यापकमाथ हातपात गर्ने, तोडफोड गर्ने जस्ता क्रियाकलाप गर्दै आएका छन् ।

गृहमन्त्री लेखकले भने, ‘त्रिभूवन विश्वविद्यालयमा नै यस्तो द्वन्द्व छ की त्यो द्वन्द्वमा पनि गृहमन्त्रालयले प्रवेश गर्नुपरेको छ । सरहरुको सुरक्षाको लागि मैले पिएसओ पठाउनुपरेको छ । यस्तो द्वन्द्व भएको छ, अहिलेसम्म त त्यो शान्तिपूर्ण नै छ । त्यो द्वन्द्व चाहीँ मैले पिएसओ फिर्ता गर्ने स्थिति बनोस् भन्ने मेरो आग्रह छ । जसले द्वन्द्व गर्नुभएको उहाँहरुलाई मेरो हार्दिक अपिल छ, त्यो पिएसओ अन्त काममा लगाउने गरेर मैले फिर्ता नगर्ने अवसर पाउँ ।’

उनले सरकार द्वन्द्व न्युनिकरणको लागि विश्वविद्यालयसँग मिलेर काम गर्न तयार रहेको बताए। उनले आत्महत्या नियन्त्रण गर्नको लागि काठमाडौं विश्वविद्यालयसँग सम्झौता गरिएको उल्लेख गर्दै द्वन्द्वका क्षेत्रमा पनि मिलेर काम गर्न आग्रह गरे ।