काठमाडौं । अमेरिकी राष्ट्रपति डोनाल्ड ट्रम्प प्रशासनको आप्रवासीहरूको अस्थायी संरक्षित दर्जा (टीपीएस) खारेज गर्ने निर्णयलाई अमेरिकाको एक पुनरावेदन अदालतले सदर गरेपछि ६० हजार प्रवासी प्रभावित भएका छन् । तीमध्ये ७ हजारभन्दा बढी नेपाली रहेका छन् ।

प्राकृतिक विपत्ति, युद्ध वा राजनीतिक अस्थिरताबाट प्रभावित देशका नागरिकलाई अमेरिकाले टीपीएस मार्फत अस्थायीरूपमा बस्ने अनुमति दिन्छ । यसमार्फत उनीहरूले रोजगारी पाउने व्यवस्था हुन्छ ।

यो सुविधा नेपालबाट गएकाहरूले भूकम्प प्रभावितका रूपमा पाइरहेका थिए । यो खारेजीसँगै उनीहरू नेपाल फर्किने वा अर्को स्टाटस बदलेर बस्ने विकल्प रहेको छ । यो निर्णयले हजारौं प्रवासीको भविष्य अनिश्चित बनाएको छ ।

नेपालबाट भूकम्पपछि पुगेका ७ हजारभन्दा बढी नेपालीले टीपीएस दर्जाबाट अमेरिकामा बसोबास गरिरहेका थिए ।