सरकारले राज्यका सबै संयन्त्र कब्जा गरेर आतंक मच्चाउन खोज्यो: सांसद मगर (भिडियो)
नागरिक प्रेस ३ भदौ २०८२
काठमाडौं । नेकपा (माओवादी केन्द्र)का सांसद सुरेशकुमार आलेमगरले सरकारले राज्यका सबै संयन्त्रहरु कब्जा गरेर राज्य आतंक मच्चाउने प्रयास गरेको आरोप लगाएका छन् ।
राष्ट्रिय सभाको मंगलवारको बैठकमा बोल्दै उनले यस्तो आरोप लगाएका हुन् । उनले सरकारले संवैधानिक निकायदेखि न्यायालयसम्म नियन्त्रण गर्ने प्रयास गरेको आभास भइरहेको टिप्पणी गरे ।
उनले भने, ‘झन्डै दुई तिहाईको सरकारले राज्यका सबै संयन्त्रमाथि कब्जा जमाएर राज्य आतंक मच्चाउन खोजेको हामीलाई आभास भएको छ । केही समय अगाडि संवैधानिक निकायका पदाधिकारीहरुको सम्बन्धमा परेको एउटा मुद्दामा सर्वोच्च अदालतका सम्माननीय प्रधानन्यायाधीशज्यु समेत अल्पमतमा रहनेगरी एउटा फैसला आएको थियो । र न्याय सम्पादन कार्यमा एउटा मजाको स्थिति सिर्जना भएको थियो । त्यसैगरी पुरुषहरुलाई बहुविवाह गर्न पाउने अधिकारको कानूनी मस्यौदाको कुरा पनि अगाडि आएको थियो । जसलाई हामी सबैले विरोध गर्यौं र यतिबेला ओझेलमा परेको छ । फेरि प्रतिनिधि सभाका सम्माननीय उपसभामुखज्यूलाई महाअभियोग लगाएर हटाउने भन्ने दुष्प्रयास भइरहेको छ भन्ने हामीले सुनेका छौं । यदि त्यस्तो भयो भने ठूलो बिडम्वना हुनेछ । यी सबै राज्य आतंक फैल्याउने कार्य बन्द गरियोस् ।’
सांसद आलेमगरले प्रतिनिधि सभाकी उपसभामुखलाई महाअभियोग लगाउने प्रयास भइरहेको सुनेको भन्दै त्यस्तो नगर्न चेतावनी दिए । उनले राज्य आतंक फैलाउने कार्य तत्काल बन्द गर्न सरकारलाई चेतावनी दिए ।
