सुनितासँगको सहकार्यमा प्रेमले ल्याए ‘म्याङ्लुङ बजार’ (भिडियो )
नागरिक प्रेस १ भदौ २०८२
काठमाडौं । गायक प्रेम सेनले नयाँ गीत ‘म्याङ्लुङ बजार’ ल्याएका छन् । गायिका सुनिता थेगिमसँग गायनमा सहकार्य गरी उनले ‘म्याङ्लुङ बजार’ ल्याएका हुन् ।
पूर्वेली भाकाको यो गीतले पहाडी जिल्ला तेह्रथुम सदरमुकाम म्याङ्लुङ बजारलाई सम्झाउँदै माया प्रेम दर्साउँछ । प्रेम भावको यो गीतमा गीतमा गायक प्रेमकै शब्द तथा सङ्गीत छ ।
गायक-गायिका स्वयं फिचर्ड गीतको भिडियोलाई दिनेश पराजुलीको छायाङ्कन, पुनम चौधरीको मेकअप र विकास धमलाको सम्पादन तथा कलर संयोजन छ । गीतलाई राजु कार्कीले एरेन्ज गरेका हुन् भने ए वान म्युजिसियन स्टुडियोमा राजेश श्रेष्ठले रेकर्डिङ र किशोर थापाले मिक्सिङ गरेका हुन् ।
‘विभिन्न व्यक्तिगत कारण र गीतकै तयारीमा केही समय लाग्दा अलि लामै ग्यापपछि गीत ल्याएको हुँ,’ गायक सेनले भने, ‘अब नियमित रूपमा गीत सार्वजनिक गर्ने सोचमा छु । यस पटक पूर्वेली भाकाको गीत ल्याएको छु ।’
पश्चिमका लोकदोहोरी गीतको बजार राम्रो भइरहेको बेला पूर्वेली गीतलाई पनि फेरि एक पटक चिनाउने प्रयास गरेको उनले बताए ।
लामो समय शास्त्रीय सङ्गीतको औपचारिक प्रशिक्षण समेत लिएर डेढ दशकभन्दा बढी समयदेखि साङ्गीतिक क्षेत्रमा सक्रिय प्रेमका यसअघि सानी, तिम्रो पाउजु, आऊ गाऔँ, तिमीले लाको चौबन्दी लगायत गीत रुचाइएका थिए ।
भिडियो हेर्नुस्
