काठमाडौं । कुनै समय नेपाली फुटबल र मूल धारको राजनीतिमा समेत चर्चाको शिखरमा रहेका गणेश थापा अचेल युद्धमा हारेको सिपाइ सरह बनेका छन् ।

अखिल नेपाल फुटबल संघ (एन्फा) को अध्यक्ष रहँदा आर्थिक अनियमितता र भष्ट्राचारको आरोपमा विश्व फुटबल महासंघ (फिफा) को १० वर्षे प्रतिबन्धमा परेका थापाको प्रतिवन्ध केही महिना अघि मात्र खुलेको थियो ।

प्रतिबन्ध खुलेपछि पनि गत वैशाखमा काभे्रमा भएको एन्फाको साधारण सभामा प्रतिनिधिको रुपमा थापालाई बन्देज गरियो । बन्देजपछि थापा र उनका छोरा गौरव थापाले एन्फाका अध्यक्ष पंकजविक्रम नेम्वाङ्गविरुद्ध पाटन उच्च अदालतमा अवहेलना र उत्प्रेषणको रिट दायर गरेका थिए । तर थापाले दायर गरेको मुद्दालाई उच्च अदालत पाटनले खारेज गरिदिएको छ ।

अदालतका न्यायाधीश ऋषिराजभण्डारी र प्रकाश खरेलको आजको इजलासले काठमाडौं महानगरपालिका–४ का गौरव थापाले दायर गरेको मुद्दालाई खारेज गरिदिएको हो ।

नेपाली फुटबलको सर्वोच्च निकाय एन्फाका अध्यक्ष नेम्वाङ्गविरुद्ध थापाले वैशाख २३ गते उत्प्रेषण र जेठ २ गते अवहेलनाको मुद्दा दायर गरेका थिए । थापाले दायर गरेको अवहेलना मुद्दा सुरु क्षेत्राधिकार दुनियावादी फौजदारी किसिमको रहेको थियो ।

यस्तै अदालतले गत असार ४ गते एन्फाका पूर्वअध्यक्ष गणेश थापाले दायर गरेको अवहेलनाको मुद्दा पनि दाबी नपुग्ने फैसला गरेको थियो । अध्यक्ष नेम्वाङ्गविरुद्ध पूर्वअध्यक्ष थापाले वैशाख १९ गते उत्प्रेषण र वैशाख ३१ गते अवहेलनाको मुद्दा दायर गरेका थिए ।

उक्त मुद्दामा न्यायाधीशद्धय मुनेन्द्रप्रसाद अवस्थी र कृष्णराज कोइरालाले दाबी नपुग्ने फैसला गरेका थिए। पूर्वअध्यक्ष थापा यसअघि १० वर्ष फिफाको कार्वाहीमा परेर केही महिनाअघि फुकुवा भएका हुन् । नेपाली फुटबलमा भएको ठूलो रकमको भ्रष्टाचार अभियोगमा उनीविरुद्ध चार वर्षको अनुसन्धानपछि २०७२ सालमा प्रतिबन्धको कार्वाही भएको थियो ।

फिफाको इथिक्स कमिटिले थापालाई सन् २००९ र २०११ म भएको फिफा कार्यसमिति निर्वाचनमा एसियाली प्रतिनिधि चयन गर्ने क्रममा आर्थिक लाम लिएको आरोप थियो । थापालाई फिफाले प्रतिबन्धसहित २० हजार अमेरिकी डलर सकेत जरिवाना गरेको थियो ।

बाबु र छोरा दुवैको मुद्दा खारेज भएपछि फुटबलमा पुनः चुरी फुरी गर्न लागेका थापा परिवारमा सन्नाटा छाएको छ । अदालतको निर्णयले थापा बाबु छोरालाई एन्फा प्रतिनिधिको रुपमा एन्फा जाने बाटो बन्द भएको छ ।

प्रतिबन्धमा रहेपनि उनै थापाको पुरानो लिगेसीको सहयोगमा तीन वर्षअघि भएको एन्फा निर्वाचनबाट पंकजविक्रम नेम्वाङ्ग एन्फाको चार वर्षे कार्यकालका लागि अध्यक्ष बनेका थिए । अध्यक्ष बनेपछि नेम्वाङ्गले थापाको साथ छाडेका थिए ।

आफुविरुद्धको मुद्दा खारेजभएपछि एन्फा अध्यक्ष नेम्वाङ्गले सत्यको जित भएको बताएका छन् । उनले फुटबलको विकासमा एन्फा खटेर लागिरहेको बताउँदै नेम्वाङ्गले गलत प्रवृत्तिबाट फुटबललाई कमजोर बनाउने काम गरिएपनि त्यो सम्भव नभएको जिकिर गरे । अदालतले साथ दिएपनि नेम्वाङ्गको कार्यकाल पनि फुटबल गतिविधिको हिसावले सन्तोषजक छैन ।