कांग्रेस सधैं नवप्रवर्तन र प्रविधिमार्फत सामाजिक रुपान्तरणको पक्षमा: देउवा
नागरिक प्रेस ३० साउन २०८२
काठमाडौं । नेपाली कांग्रेसका सभापति शेरबहादुर देउवाले आफ्नो पार्टी सधैं नवप्रवर्तनशील र प्रविधिमैत्री भएर सामाजिक रुपान्तरणको पक्षमा उभिँदै आएको बताएका छन्।
कांग्रेस सूचना, संचार तथा प्रचार विभागद्वारा आयोजित ‘डिजिटल प्लेटफर्मको प्रयोग, प्रभाव र असर’ विषयक अन्तरक्रिया कार्यक्रममा देउवाले अब सबै मिलेर प्रविधिमैत्री, नवप्रवर्तनशील र समृद्ध डिजिटल नेपाल निर्माणमा लाग्नुपर्ने समय आएको बताए।
उनले डिजिटल प्लेटफर्मले काममा सहजता र तीव्रता ल्याइ समय बचत गराएको उल्लेख गर्दै, यसका सकारात्मक प्रभावका साथै केही नकारात्मक असर पनि भएको बताए। नागरिक असुरक्षासम्बन्धी समस्याहरूको समाधानका लागि सरकार र सरोकारवाला निकायहरूले समयमै ध्यान दिनुपर्ने बताए।
देउवाले नेपाली कांग्रेस नेतृत्वको सरकारले जारी गरेको दूरसञ्चार सम्बन्धी नीति, ऐन र नियमहरूले नेपालका टाढाका बस्तीहरू र सबै नागरिकलाई प्रविधिको पहुँचमा ल्याएको दाबी पनि गरे।
