भैरहवा  । लोकतान्त्रिक समाजवादी पार्टी नेपालका पूर्व केन्द्रीय सदस्य महेन्द्र गुप्ता (प्रशान्त)ले पार्टीमा भएको विभेदको विरोध गर्दा पार्टीबाट निष्कासन गरिएको बताएका छन् ।

‘लोकतान्त्रिक पद्धतिमा लोकतान्त्रिक तरिकाले मन्त्रीको चयन हुनुपर्छ, पार्टीको कार्यशैली ठिक भएन’ भन्ने सामाजिक सञ्जालमा राखेको भरमा कारबाही स्वरूप निष्कासन गरिएको उनले जनाएका छन् ।

भैरहवामा पत्रकारहरूसँग कुरा गर्दै गुप्ताले भने, ‘मैले कुनै व्यक्तिलाई तोकेर गाली गरेको पनि हैन, पार्टीलाई मन्त्रीमा एउटा युवालाई मौका दिनु मात्रै भनेको हो । अलोकतान्त्रिक तरिकाले पार्टीबाट कारबाही गरेको छ, न त स्पष्टीकरण सोधियो, न जानकारी नै गराइयो १८ वर्ष देखि सक्रिय राजनीतिमा लाग्दा कति सम्पत्ति गुम्यो, व्यक्तिगत लगानीबाट मधेसमा सङ्घर्ष गरियो, आन्दोलन गरियो, अहिले अपमान, विभेद बाहेक केही नपाएकोले न्यायको लागि पत्रकार सम्मेलन गर्नुपरेको छ ।’

केन्द्रीय सदस्य महेन्द्र गुप्ता (प्रशान्त) ले मदेसको मुद्दालाई लिएर हिडेको युवा हो, कसैले निगाहमा नेता नबनाएको उनको दाबी छ । २०६२/०६३ को मधेस आन्दोलन देखि तराई मदेसका जनताको हितमा निष्ठापूर्वक लागे बापत सजाय स्वरूप पार्टीले निरङ्कुश शैलीले आफूमाथि कारबाही गरेको उनको भनाइ छ । ‘लोकतान्त्रिक पार्टी कागजमा मात्रै सीमित छ, सदन र सडकबाट लोकतन्त्रको कुरा गर्ने एक दुई तानासाही नेताको सनकका कारण पार्टीको आन्दोलनकारी र क्रान्तिकारीलाई कारबाही गर्ने यो कुन तरिकाको लोकतन्त्रवादी, समाजवादी पार्टी हो ?’ उनको प्रश्न छ ।

‘प्रदेशको ४ पटक मन्त्री बन्दा पनि रिपोट कार्ड खै ? यहाँकै जनता र मधेसको लागि कुनै पनि रिपोट कार्ड आएन । आफै कानुन मन्त्री हुँदा पनि प्रदेश आयोगमा समावेशीको कुरामा मधेसीको लागि सक्रियता नदेखाउनु, अरूले आन्दोलन गरेर लिखित रूपमा पास गराउनु पर्‍यो । पार्टीको अध्यक्षलाई तोकेर गाली गर्दा पनि कारबाही नहुने मैले सामाजिक सञ्जालमा लेख्दा अलोकतान्त्रिक तरिकाले निकाल्ने ?’ उनले भने ।

उनले प्रतिनिधि सभा सदस्य सर्बेन्द्रनाथ  शुक्लालाई इङ्गित गर्दै भने ‘मधेसको नाममा मार्चवरको विकास हुन नदिने, मार्चवरमा शासक भनेर बस्ने निर्वाचित सांसदले पुरानो मार्चवर नभई नयाँ मार्चवर हो, राम्रो काम गरे फुलको माला नराम्रो गरे जुत्ताको माला लगाउन तयार हुनुपर्छ ।’

बोल्ने अधिकार पनि हनन भइरहँदा आफू चुप लागेर नबस्ने बताउँदै भने, ‘अबको मार्चवर तानासाह मुक्त मार्चवर हो, मार्चवरको ठेकेदार कोही नबनोस्, मार्चवर यहाँ कै वासिन्दाको हो, मर्चवारले अबको नेतृत्वले तानाशाहको पत्ता साफ गर्छ,’ उनले भने । उनीसँगै १ सय ५३ जनाले लोसपा परित्याग गरेका छन् ।