मुम्बई- एआई अर्थात् आर्टिफिसियल इन्टेलिजेन्सले हरेक क्षेत्रमा आफ्नो हस्तक्षेप सुरु गरेको छ ।

अहिले संगीतको दुनियाँमा पनि यसको प्रयोग हुन थालेको छ । ओस्कार विजेता संगीतकार एआर रहमानले आफ्नो आगामी प्रोजेक्ट फिल्म  ‘लाल सलाम’ मा दुई गायकको स्वर प्रयोग गरेको बताएका छन्, जो यस संसारमा छैनन् । उनले गायक बम्बा बक्या र शाहुल हमिदको आवाजलाई पुनर्जीवित गर्न एआई प्रयोग गरिएको बताए ।

यो खबर बाहिरिए पछि इन्टरनेटमा प्रयोगकर्ताहरुले विभिन्न प्रतिक्रिया दिइरहेका छन् । कतिपयले एआर रहमानको प्रतिभाको तारिफ गरिरहेका छन् भने धेरैले यो सही नभएको विश्वास गरेका छन् ।

रजनीकान्तको आगामी फिल्म  ‘लाल सलाम’को  ‘थिमिरी येजुदा’ गीतमा दुवै दिवंगत गायकको स्वर सुनिने भएको छ । एआर रहमानले गायकको परिवारबाट अनुमति लिएको र आवाज प्रयोग गर्दा पैसा पनि तिरेको बताउँछन् ।

रहमानले सामाजिक सञ्जाल प्लेटफर्म ‘एक्स’ मा लेखेका छन् कि हामीले गायकहरूको परिवारबाट अनुमति लिएका छौं र उनीहरूको आवाज एल्गोरिदम प्रयोग गर्न पैसा पनि तिरेका छौं। रहमान भन्छन्,  ‘प्रविधिको सही प्रयोग गरेमा खतरा हुँदैन । उनले लेखेका छन्, नोस्टाल्जियालाई सम्मान गर्नुहोस्।’

यद्यपि, केही प्रयोगकर्ताहरूले यो कदमलाई समर्थन गर्दैनन्। एक प्रयोगकर्ताले लेखेका छन् कि यसले उद्योगका ती गायकहरूलाई स्तब्ध पार्छ, जो आफूलाई स्थापित गर्न संघर्ष गरिरहेका छन्। अन्य प्रयोगकर्ताहरूले रहमानको रचनात्मकताको प्रशंसा गरिरहेका छन्। फिल्म ‘लाल सलाम’लाई ऐश्वर्या रजनीकान्तले निर्देशन गर्दैछिन् । मिडिया रिपोर्टका अनुसार रजनीकान्त फिल्ममा एक्सन गर्दै देखिने छन् ।

एआईको सहयोगमा दिवंगत गायकको आवाजलाई उद्योगमा पहिलो पटक ‘रिक्रिएट’ गर्न लागिएको पनि मिडिया रिपोर्टमा लेखिएको छ ।